पाकिस्तान सुपर लीगमधील क्रिकेट सामन्यांमध्ये सट्टा खेळणाऱ्या दोघांना ठाणे पोलिसांच्या गुन्हे अन्वेषण शाखेने घोडबंदर येथून अटक केली. दीपक ठक्कर (५६) आणि जितेंद्र चंदे (४८) अशी अटकेत असलेल्या आरोपींची नावे असून पोलिसांनी त्यांच्याकडून ४ मोबाईलसह १८ हजार ७०० रुपयांचा मुद्देमाल जप्त केला आहे. घोडबंदर येथील एका हॅाटेलमध्ये काहीजण सट्टा खेळत असल्याची माहिती ठाणे गुन्हे अन्वेषण शाखेच्या युनीट एकला मिळाली होती. त्याआधारे, वरिष्ठ पोलीस निरीक्षक अनिल देशमुख, पोलीस निरीक्षक कृष्णा कोकणी, साहाय्यक पोलीस निरीक्षक निलेश मोरे, पोलीस नाईक अमोल देसाई यांच्या पथकाने सापळा रचून दिपक आणि जितेंद्र या दोघांना ताब्यात घेतले. हे दोघेही पाकिस्तान सुपर लीग सामन्यांमध्ये सट्टा लावत असल्याचे चौकशीत समोर आले. याप्रकरणी चितळसर पोलीस ठाण्यात गुन्हा दाखल करण्यात आला असून पोलिसांनी त्यांना अटक केली आहे.