आरोपांतून मुक्तता, बदनामी थांबवा अन्यथा खटला दाखल करणार; उल्हासनगरचे बडतर्फ जनसंपर्क अधिकारी युवराज भदाणेंचा इशारा

खोटा जन्मदाखला खरा आहे असे भासवून नोकरी मिळवल्याचा ठपका ठेवत तत्कालीन जनसंपर्क अधिकारी युवराज भदाणे यांच्यावर फेब्रुवारी २०२२ मध्ये उल्हासनगर महापालिकेने फसवणुकीचा गुन्हा दाखल केला होता. त्यानंतर त्यांना सेवेतून बडतर्फही करण्यात आले होते. याच काळात त्यांच्यावर नवी मुंबईतील एपीएमसी पोलीस ठाण्यात बलात्काराचा गुन्हा दाखल झाला होता. मात्र या प्रकरणात आपल्याला नाहक गोवले गेले, हे प्रकरण न्यायालयात पोहोचल्यानंतर तक्रारदार महिलेने आपण भदाणे यांना पहिल्यांदाच पाहत असल्याचे सांगितले. तसेच आरोपीची ओळख परेड पोलिसांनी केली नव्हती. त्यामुळे मी यांना ओळखत नाही, असे तक्रारदार महिलेने स्पष्ट केले होते. तसे प्रतिज्ञापत्र महिलेने न्यायालयात सादर केले, अशी माहिती भदाणे यांनी बुधवारी पत्रकार परिषदेत दिली. त्यामुळे न्यायालयाने सन्मानाने आपल्याला या आरोपातून मुक्त केले आहे. मात्र काही समाज माध्यम खात्यावरून या गुन्ह्याची चुकीची माहिती पसरवली जाते आहे. तसेच काही दिवसांपूर्वी आपण खासदार डॉ. श्रीकांत शिंदे यांची भेट घेतली. त्यावरून अनावश्यक टीका केली जात असून ही टीका बदनामीकारक आहे. याविरूद्ध न्यायालयाचा आणि खासदारांचा अवमान केल्याप्रकरणी खटला दाखल केला जाईल, असे भदाणे यांनी स्पष्ट केले.

दोषारोप निश्चितीकरणास स्थगिती

खोटा जन्मदाखला प्रकरणातही न्यायालयाने कोणतेही दोषारोप निश्चित करण्यास स्थगिती दिली आहे, असेही त्यांनी स्पष्ट केले आहे. काही व्यक्तींनी जुना जन्मदाखला प्रसारीत करून त्यावरून तक्रारी केल्या. मात्र मोठ्या संघर्षानंतर मी खरा दाखला आर. के. तलरेजा महाविद्यालयातून मिळवला. त्या दाखल्याच्या आधारे माझ्यावर फसवणुकीचा गुन्ह्याला महत्व राहत नाही, असेही भदाणे म्हणाले. त्यामुळे काही षडयंत्र रचून केलेले हे कृत्य असल्याचा दावाही भदाणे यांनी पत्रकार परिषेदत केला. खोट्या तक्रारी देऊन मला प्रामाणिकपणे काम करण्यापासून रोखले मात्र न्यायालयाने मला न्याय दिला आहे. न्यायालयाच्या निकालांची माहिती न घेता माझी बदनामी सुरू आहे. या सर्वांवर येत्या काळात फौजदारी गुन्हा दाखल करण्याची प्रक्रिया करणार असल्याचे त्यांनी सांगितले.