मैत्रीची व्याख्या एका शब्दात सांग कठीण आहे. त्यामुळे मैत्री ही संकल्पना कधी शब्दात व्यक्त करायची नसते. ती अनुभवायची असते. अनेक जण आपल्या मैत्रीखातर काहीही करायला तयार होतात. मात्र एखादा श्वान अर्थात कुत्रा आपल्या मैत्रीसाठी स्वत:च्या प्राणाची बाजी लावत असेल तर साऱ्यांनाच अचंबित व्हायला होईल. एका श्वानाने आपल्या मैत्रीखातर समुद्राच्या लाटांमधून एका लहान मुलीचे प्राण वाचविल्याचं समोर आलं आहे. सध्या या श्वानाचा आणि लहानग्या मुलीचा व्हिडिओ व्हायरल होत आहे. सध्या सोशल मीडियावर या कुत्र्याचं प्रचंड कौतुक होत असून तो साऱ्यांसाठी स्टार झाला आहे. बोलता न येणारा पण आपल्या भावना समजून घेणारा हा कुत्रा आपल्या लहानग्या मैत्रिणीला वाचविण्यासाठी कसोशीने प्रयत्न करताना या व्हिडिओमध्ये दिसत आहे. फ्रान्समधील एका समुद्रकिनारी एक लहान मुलगी आपल्या कुत्र्यासमवेत पाण्यात खेळत होती. यावेळी समुद्रात मोठमोठ्या लाटा उसळत होत्या. त्यामुळ ही लहानगी पाण्यात ओढली जाईल या भितीने तिच्या पाळीव श्वानाने तिला समुद्रकिनाऱ्यावर खेचत आणलं. विशेष म्हणजे या श्वानाच्या मनात चिमुरडीवर असलेलं प्रेम पाहून उपस्थित साऱ्यांनाच त्यांच कौतुक वाटलं. दरम्यान, हा व्हिडिओ आतापर्यंत १० लाखांपेक्षा जास्त लोकांनी पाहिला असून अनेकांनी तो शेअरही केला आहे.
