कोणत्याही ठिकाणी किंवा व्यक्तीसोबत सेल्फी घेणं आजकाल सामान्य बाब झालीये. लोकांना सेल्फी घेण्याची इतकी सवय लागलीये की हातातली एकही चांगली संधी कोणी सोडत नाही. मग कोणी वृ्दध असो की एखादी महिला किंवा लहान मुलगा, सर्वांनाच सध्या सेल्फीचं ‘याड’ लागलंय. पण, सेल्फीच्या नादात अपघात घडल्याचंही अनेकदा समोर आलंय. कित्येकदा सेल्फी जीवघेणा ठरल्याच्या बातम्या आपण वाचल्यात. सध्या सोशल मीडियावर एका तरुणीचा एक सेल्फी व्हिडिओ प्रचंड व्हायरल होतोय. हा व्हिडिओ पाहून तुम्हाला हसू आवरणं कठीण होईल हे नक्की, पण त्यासोबतच सेल्फी घेताना सर्व खबरदारी घेण्याची गरज असल्याचंही लक्षात येईल.

व्हायरल होणाऱ्या व्हिडिओमध्ये एक तरुणी बकरीसोबत सेल्फी व्हिडिओ बनवण्याच्या प्रयत्नात असल्याचं दिसतंय. पहिल्यांदा बकरी शांत उभी राहते, पण थोड्याच वेळात बकरीला राग येतो आणि तरुणीला टक्कर मारण्यासाठी ती थोडी मागे जाते. दोन वेळेस तरुणीला टक्कर देण्याचा बकरी प्रयत्न करते, पण तिला टक्कर मारता येत नाही. अखेर तिसऱ्यांदा मात्र सेल्फी व्हिडिओ बनवण्यात मग्न असलेल्या तरुणीला बकरी अत्यंत जोरदार टक्कर देते. तरुणी सेल्फी व्हिडिओत इतकी मग्न असते की बकरीपासून आपल्याला धोका असू शकतो याचा ती विचारही करत नाही. इन्स्टाग्रामवर ‘द वाइल्ड कॅप्चर’ नावाच्या हँडलवरुन हा व्हिडिओ शेअर करण्यात आला आहे.


ही घटना नेमकी कुठली आहे हे अद्याप समजू शकलेलं नाही, पण इन्स्टाग्रामवर शेअर झाल्यापासून हा व्हिडिओ चांगलाच व्हायरल होतोय.