ऑस्ट्रेलियन संघाचा माजी क्रिकेटपटू ब्रेट लीनं किक्रेटमधून संन्यास घेतलाय, सध्या कमेंटेटरच्या भूमिकेत असेलल्या ४१ वर्षीय ब्रेट लीला क्रिकेट खेळण्याचा मोह अनावर झाला. तेव्हा संन्यासाचा वेश धारण करून ब्रेट क्रिकेटची पंढरी शिवाजी पार्कात पोहोचला. मैदानात खेळणाऱ्या मुलांसोबत ब्रेट लीनं एक प्रँक केला. लांब केस, लांब दाढी, भगवा कुडता परिधान करून ब्रेट तिथे पोहोचला. आश्चर्य म्हणजे त्याला एकानंही ओळखलं नाही.

ब्रेट लीनं लहान मुलांसोबत क्रिकेट खेळण्याचा मनमुराद आनंद क्रिकेटच्या पंढरीत घेतला. अखेरपर्यंत एकालाही ब्रेट लीला ओळखता आलं नाही. शेवटी ब्रेटनं, त्याने लावलेले खोटे केस आणि दाढी काढली तेव्हा ब्रेटलीला पाहून लहान मुलांच्या आनंदाला पारावर उरला नाही. मुलं अक्षरश: त्याच्याभोवती आनंदानं नाचू लागली. काहींनी तर ऑटोग्राफसाठी बॅटही पुढे केली. ‘स्टार स्पोर्ट’नं ब्रेट लीचा हा व्हिडिओ सोशल मीडियावर शेअर केलाय.