दिल्लीतील मालविया नगर परिसरात एक छोटासा ढाबा चालवणारे ८० वर्षीय कांता प्रसाद यांच्या मदतीला आज संपूर्ण देश पुढे सरसावला आहे. करोनाचा प्रादुर्भाव आणि लॉकडाउनमुळे गेल्या अनेक दिवसांपासून काहीच कमाई होत नसल्याचं सांगताना त्यांचे डोळे पाणावले होते. हा व्हिडीओ सोशल मीडियावर वाऱ्याच्या वेगाने व्हायरल झाला आणि देशाच्या कानाकोपऱ्यातून त्यांना मदत मिळू लागली आहे. ‘बाबा का ढाबा’वर आता लोकांनी खच्चून गर्दी केली असून कांता प्रसाद यांच्या चेहऱ्यावर हसू आणण्याचं काम सोशल मीडियाच्या ताकदीने केलंय. विशेष म्हणजे 'बाबा का ढाबा'चे मालक कांता प्रसाद यांच्या मदतीला झोमॅटोही धावून आले आहे. बाबा का ढाबा आता झोमॅटोवर लिस्ट झालं आहे. घरबसल्या आता दिल्लीकर झोमॅटोवरुन बाबा का ढाबामधून पदार्थ ऑर्डर करु शकतील. झोमॅटोने ट्विट करत याची माहिती दिली आहे. ट्विटमध्ये त्यांनी म्हटलेय की, ''बाबा का ढाबा आता झोमॅटोवर लिस्ट करण्यात आला आहे. आमची टीम तेथील वृद्ध दाम्पत्यासोबत काम करतेय. जेणेकरुन वेळेवर डिलिव्हरी होईल.'' UPDATE: baba ka dhaba is now listed on zomato and our team is working with the elderly couple there to enable food deliveries thank you to the good people of the internet for bringing our attention to this — zomato india (@ZomatoIN) October 8, 2020 सुनील शेट्टी, स्वरा भास्कर, रवीना टंडन अशा अनेक सेलिब्रिटींनी सोशल मीडियावर ‘बाबा का ढाबा’च्या मदतीसाठी आवाहन केलं. क्रिकेटर आर. अश्विन, अभिनेता रणदीप हुडा, सोनम कपूर यांनीसुद्धा या वयोवृद्ध जोडप्याची मदत केली आहे. रणदीप हुडाने ‘बाबा का ढाबा’चा पत्ता ट्विटरवर लिहित लोकांना तिथे जाऊन मदत करण्याची विनंती केली. तर ”बाबा का ढाबा’. दिल्लीवालो दिल दिखाओ. जो कोणी इथे येऊन जेवेल त्यांनी मला एक फोटो पाठवा. तो फोटो मी सोशल मीडियावर शेअर करेन. सोबतच तुमच्यासाठी एक खास मेसेजदेखील पाठवेन”, असं आवाहन रविनाने नेटकऱ्यांना केलं.