छत्रपती शिवाजी महाराजांची जयंती शुक्रवारी देशासह राज्यभरात उत्साहात साजरी झाली. विविध कार्यक्रमांचं आयोजन आणि जय भवानी, जय शिवरायच्या जयघोषात सर्वत्र शिवजयंतीचा उत्साह पाहायला मिळाला. अनेक राजकीय नेते, अभिनेते, खेळाडू अशा जवळपास सर्वच स्तरातील मंडळींनी छत्रपतींना अभिवादन केले. आपल्या हटके ट्विटसाठी नेहमीच चर्चेत असलेला भारताचा माजी धडाकेबाज खेळाडू विरेंद्र सेहवागनेही शिवाजी महाराजांच्या पराक्रमाची महती सांगणारं खास ट्विट केलं. त्याचं हे ट्विट सध्या चांगलंच व्हायरल होत आहे. शिवरायांचा अश्वावर आरुढ झालेला एक फोटो सेहवागने ट्विट केला आहे. या फोटोसोबत, "इतिहास सांगतो की, सामर्थ्यवान लोकं एखाद्या शक्तिशाली ठिकाणाहून येतात. पण इतिहास चुकीचा होता!. सामर्थ्यवान लोकांमुळे काही ठिकाणं शक्तिशाली बनतात", अशा शब्दांमध्ये सेहवागने शिवाजी महाराजांची महती सांगितली आहे. यासोबतच, "छत्रपती शिवरायांना माझं वंदन… जय माँ भवानी", अशी घोषणाही सेहवागने शिवजयंतीनिमित्त ट्विटमधून दिली. “History tells us that powerful people come from powerful places. History was wrong! Powerful people make places powerful" Tributes to the great Chhatrapati #ShivajiMaharaj on his Jayanti. Jai Maa Bhavani pic.twitter.com/frRS8hroEc — Virender Sehwag (@virendersehwag) February 19, 2021 सेहवागचं हे ट्विट शिवप्रेमींच्या चांगलंच पसंतीस पडलं असून हजारो जणांनी त्याचं हे ट्विट लाइक व रिट्विट केलं आहे. सध्या त्याचं हे ट्विट बरंच व्हायरल होतंय. दरम्यान, शुक्रवारी किल्ले शिवनेरीवर मुख्यमंत्री उद्धव ठाकरे आणि उपमुख्यमंत्री अजित पवार यांच्या उपस्थितीत शिवजन्मोत्सव कार्यक्रम उत्साहात पार पडला.