सध्या सोशल मीडियावर विश्वसुंदरीचा किताब पटकावणाऱ्या भारताच्या मानुषी छिल्लरची मोठ्या प्रमाणावर चर्चा सुरू आहे. तिने 'मिस वर्ल्ड'ची स्पर्धा जिंकल्यानंतर तिच्यावर चहूबाजूंनी शुभेच्छांचा वर्षाव झाला होता. मात्र, यावेळी मानुषीबाबत मजेशीर टिप्पणी करायला गेलेल्या काँग्रेस नेते शशी थरूर यांना मोठ्या टीकेला सामोरे जावे लागले होते. याबद्दल शशी थरूर यांनी जाहीर माफी मागत टीकाकारांनी शांत राहण्याचा सल्ला दिला होता. आता टीकाकारांनी थरूर यांचा सल्ला कितपत मनावर घेतला हे माहिती नाही. मात्र, स्वत: मानुषी छिल्लरने हा सल्ला प्रमाण मानून हा वाद संपवला आहे. तिने ट्विट करून म्हटले आहे की, जग जिंकणारी मुलगी दुसऱ्यांच्या फुटकळ बोलण्याने निराश होणार नाही. 'चिल्लर' ही केवळ एक शाब्दिक कोटी होती. तेव्हा 'Chhillar' मध्ये असणारा 'Chill' विसरू नका, असे सांगत मानुषीने या वादावर पडदा टाकण्याचा प्रयत्न केला. शशी थरूर यांनी शाब्दिक कोटी करण्याच्या नादात अनवधानाने मानुषीच्या आडनावावरून तिची खिल्ली उडवली होती. छिल्लर हे आडनाव त्यांनी नोटाबंदीशी जोडले. ‘मोदी सरकारने आमच्या काळात सुरू असलेले चलन बंद केले. ही त्यांची सर्वात मोठी चूक आहे. आमच्या काळात असलेली चिल्लरही आता मिस वर्ल्ड झाली’ या आशयाचे ट्विट शशी थरूर यांनी केले होते. त्यानंतर ट्विटरकरांनी शशी थरूर यांच्यावर टीका केली होती. मानुषी छिल्लरने ‘मिस वर्ल्ड’चा किताब जिंकला आहे. तिची अशा प्रकारे खिल्ली उडवणे चूक आहे. तुम्हाला हे वर्तन शोभत नाही, असे काही नेटकऱ्यांनी त्यांना सुनावले होते. यावरून शशी थरूर यांनी ट्विटवरून दिलगिरी व्यक्त केली होती. मी केवळ मजेत तसे म्हटले होते. यामागे मानुषीबद्दल आक्षेपार्ह टिप्पणी करण्याचा माझा कोणताही हेतू नव्हता. शाब्दिक कोटी हा विनोदाचा प्राथमिक प्रकार आहे. द्विअर्थी शाब्दिक कोटी पण याचाच एक भाग आहे. मात्र, ज्यांना माझे ट्विट खरोखरच आक्षेपार्ह वाटले, त्या सर्वांची मी माफी मागतो. मात्र, मानुषीसारख्या उज्ज्वल भविष्य असणाऱ्या मुलीबाबत मला कोणतीही आक्षेपार्ह टिप्पणी करायची नव्हती. मी या अगोदरच तिचे कौतुक केले आहे. तेव्हा शांत व्हा, असे थरूर यांनी म्हटले होते.
