आपले आईवडिल हेच आपले सर्वस्व असतात. त्यांची काळजी घेणे हे आपले काम असते. त्यातही त्यांना कोणत्या आजाराने ग्रासले तर मग आपण त्यांची विशेष काळजी घेतो. आता ही काळजी घेणे वगैरे ठीक आहे. पण ६ वर्षांची एक चिमुकली आपल्या अर्धांगवायू झालेल्या वडिलांना जीवापाड जपत आहे. चीनमध्ये तिच्या वडिलांचा अपघात झाल्यानंतर तिच्या आईने वडिलांना सोडून दिले. त्यानंतर ही मुलगी आणि तिचे वडिल दोघेच एकत्र राहू लागले. वडिल व्हीलचेअरवर असल्याने ते त्यांची स्वत:ची कामेही करु शकत नाहीत. त्यामुळे ही चिमुकली परिस्थिती समजून घेत घराची जबाबदारी सांभाळते. तिचे नाव जिया असून ती सकाळी ६ वाजता उठून आपल्या वडिलांना मसाज करते. त्यानंतर आपल्या प्रात:विधी उरकते. इतकेच नाही तर ही चिमुकली वडिलांचे सगळे करुन शाळेतही जाते. शाळेतून आल्यावरही त्यांना खायला भरविण्याचे, घरातल्या घरात फिरवण्याचे, कधी बाहेर घेऊन जाण्याचे काम ती अतिशय निघुतीने करते. ती शाळेला गेल्यावर तिचे शेती करणारे आजीआजोबा तिच्या वडिलांची काळजी घेतात. विशेष म्हणजे हे करताना ती आपल्यावर ताण येत असल्याचा कोणताच आव आणत नाही. तर अगदी सहजपणे हे सगळे करते. आता इतक्या लहान वयात जियाकडे ही इतका समजूतदारपणा कुठून आला असा प्रश्न तुम्हालाही पडल्याशिवाय राहणार नाही. मला वडिलांची काळजी घेताना अजिबात दमायला होत नाही असे ती निरागसपणे सांगत असल्याचे चीनमधील माध्यमांनी सांगितले. २०१६मध्ये अपघात झाल्यानंतर तियान हायचेंग या ४० वर्षीय पुरुषाचा जोरदार अपघात झाला. अपघातानंतर जियाची आई आपल्या माहेरी निघून गेली. काही दिवस माहेरी राहून येते सांगून गेलेली ती पुन्हा कधीच आली नाही. जियाने आपल्या वडिलांचा वैद्यकीय खर्च करण्यासाठी मदतीचे आवाहनही केले आहे. त्याला सर्व स्तरातून मोठा प्रतिसाद मिळत असल्याचे दिसते.
