पंधरा वर्षांची अलिशा रघुनंदन ही भारतीय वंशाची मुलगी सध्या जगप्रसिद्ध पॉपस्टार केटी पेरीच्या गळ्यातलं ताईत बनली आहे. अलिशा अमेरिकन आयडलमध्ये ऑडिशनसाठी गेली होती. यावेळी तिच्या आवाजाची जादू केटीवर इतकी चढली की अलिशाचं गाणं संपल्यावर तिच्या डोळ्याच्या पापण्याही ओलावल्या. अर्थात अलिशानं इतरही परीक्षकांची मनं आपल्या सुरेल आवाजानं जिंकत अमेरिकन आयडलमध्ये आपला प्रवेश निश्चित केला आहे.

अलिशा आपल्या वडिलांसोबत राहते. तिच्या पालकांचा घटस्पोट झाला. त्यानंतर तिचा सांभाळ वडिलच करू लागले. तिला गायक व्हायचं आहे आणि यात वडिल आपल्याला खूप साथ देतात. ते नेहमीच माझ्या पाठीशी उभे असतात असंही ती परीक्षकांना सांगत होती. अलिशानं ऑडिशनमध्ये Is Never Enough ‘इज नेव्हर इनफ’ हे गाणं गायलं. तिचं गाणं संपल्यानंतर तिघंही परीक्षक भारावून तिच्याकडे पाहत होते. केटीच्या डोळ्यात तर अश्रूही आले होते. तिचं गाणं ऐकून केटी इतकी प्रभावीत झाली की अमेरिकन आयडलच्या अंतिम दहा स्पर्धकांमध्ये ती सहज पोहोचू शकते असं कौतुक करत तिच्या सुरेल आवाजाची पोचपावती केटीनं दिली.