करोनाच्या पार्श्वभूमीवर लॉकडाउनच्या कालावधीमध्ये केवळ अत्यावश्यक सेवेतील कर्मचाऱ्यांना परवानगी देण्यात आली होती. दवाखाने, बँका आणि आरोग्यसेवांबरोबरच पाणी, वीज यासारख्या अत्यावश्यक सेवा पुरवणारे कर्मचारीही या कालावधीमध्ये काम करत होते. अशाच एका महिला कर्मचाऱ्याचा व्हिडिओ ट्विटवरुन ऑल इंडिया रेडिओ न्यूजने शेअर केला आहे. वीज विभागामध्ये काम करणारी ही महिला कर्मचारी महाराष्ट्रामधील बीड जिल्ह्यातील आहे. ऑल इंडिया रेडिओ न्यूजच्या @airnewsalerts य़ा ट्विटर हॅण्डलवरुन एक मिनिटं ३६ सेकंदांचा व्हिडिओ शेअर करण्यात आला आहे. यामध्ये एक महिला वीजेच्या खांबावर चढून दुरुस्ती करताना दिसत आहे. "एखादी महिला वीजेच्या खांबावर चढून वायर दुरुस्त करत असल्याचे तुम्ही कधी ऐकलं आहे का? तर या आहेत महाराष्ट्रामधील बीड येथील उषा जगदाळे. पुरुषांचे वर्चस्व असणाऱ्या या श्रेत्रामध्ये उषा या अपवाद आहेत. ग्राहकांनी तक्रार केल्यानंतर त्याची तातडीने दखल घेत त्या लॉकडाउनच्या कालावधीमध्ये वीजपुरवठा खंडित होणार नाही याची काळजी घेतात," असं हा व्हिडिओ शेअर करताना कॅप्शनमध्ये नमूद करण्यात आलं आहे. व्हिडिओमध्ये उषा या काही सेकंदांमध्ये कोणत्याही दोरीचा किंवा क्रेनचा आधार न घेता काही फूट उंच खांबावर नारळाच्या झाडावर चढल्याप्रमाणे चढतात. खांबावर चढल्यानंतर त्या स्वत:चा तोल सावरत गुंतागुंतीच्या वायर्समधील बिघाड दूर करतानाही व्हिडिओमध्ये दिसत आहे. Ever heard of a woman climbing electric poles, fixing snapped wire? Usha Jagdale working in #Maharashtra's Beed is exception in male dominated profession. By addressing grievances of consumers effectively she ensured uninterrupted power supply during #lockdown Report: Shashi pic.twitter.com/D2ix4jWO7T — All India Radio News (@airnewsalerts) August 10, 2020 हा व्हिडिओ दोन हजारहून अधिक जणांनी शेअर केला आहे. तर अवघ्या २४ तासांमध्ये व्हिडिओला एक लाख ६८ हजारहून अधिक व्ह्यूज आहेत. मात्र या व्हिडिओखाली अनेकांनी अशाप्रकारे या महिलेला जीव धोक्यात टाकून काम करावं लागत असल्याबद्दल नाराजी व्यक्त केली आहे. या महिलेच्या शौर्याला सलाम करतच तिच्याबद्दलची चिंता अनेकांनी व्यक्त केल्याचे व्हिडिओखालील कमेंटमध्ये दिसून येत आहे.