सोशल मीडियावर एक व्हिडीओ सध्या व्हायरल झाला आहे. या व्हिडीओत एक महिला नवव्या मजल्यावरुन खाली पडताना दिसत आहे. विशेष म्हणजे नवव्या मजल्यावरुन खाली पडल्यानंतरही महिला काहीच न झाल्याप्रमाणे उभी राहून चालू लागते. हा व्हिडीओ पाहून नेटकरी हैराण झाले असून आश्चर्य व्यक्त करत आहेत. काहीजण तर ही महिला एलियन असल्याचा दावा करत आहेत. हा व्हिडीओ रशियामधील आहे.

३२ सेकंदांचा हा व्हिडीओ सोशल मीडियावर प्रचंड व्हायरल झाला आहे. या व्हिडीओत २७ वर्षीय महिला इमारतीच्या नवव्या मजल्यावरुन खाली पडताना दिसत आहे. खिडकीत काही काम करत असताना महिलेचा तोल जातो आणि खाली साचलेल्या बर्फात पडते. इतक्या उंचीवरुन खाली पडल्यानंतर महिला गंभीर जखमी झाली असेल असं वाटणं साहजिक आहे. पण असं काहीच होत नाही. महिला काहीच न झाल्यासारखी उभी राहते आणि शांतपणे चालत तेथून निघून जाते.

हा व्हिडीओ १५ हजाराहून जास्त वेळा पाहिला गेला आहे. अनेकांनी तर आपला डोळ्यावर विश्वासच बसत नसल्याचं म्हटलं आहे. दरम्यान काहीजणांनी ट्विटमध्ये महिलेला काही अंतर्गत जखमा झाल्या असून आयसीयूमध्ये ठेवण्यात आल्याचं सांगितलं आहे.