“बाईपण भारी देवा” चित्रपट सर्वांनी पाहिला आहे. कुटुंब, घर, संसार, नवरा-मुलं, सासू-सासरे, सासर-माहेर, नोकरीमध्ये सर्व काही सांभाळताना, इतरांसाठी जगताना स्वत:साठी विसरून जाणाऱ्या प्रत्येक महिलेची गोष्ट या चित्रपटातून मांडली आहे. हा चित्रपट पाहून अनेक महिलांना आपलीच गोष्ट पडद्यावर पाहतोय की काय असे वाटले. इतरांसाठी जगताना स्वत:साठी जगायला विसरू नये हाच संदेश हा चित्रपट सर्वांना देतो. ही झाली चित्रपटाची गोष्ट पण खऱ्या आयुष्यात मैत्रिणींबरोबर वेळ काढून फिरायला जाणे अनेक महिलांना आजही अशक्य वाटते. पण कास पठार पाहण्यासाठी आलेल्या या महिलांनी खऱ्या आयुष्यात अशक्य वाटणारी गोष्टही शक्य करून दाखवली आहे. सध्या या महिलांचा व्हिडिओ सोशल मीडियावर व्हायरल होत आहे.
व्हायरल व्हिडीओमध्ये बीड येथून काही महिलांचा ग्रुप कास पठार येथे फिरायला आलेल्या दिसत आहे. व्हि़डीओमध्ये महिला सांगतात की, त्या तापोळा आणि कासपठारला भेट दिली आहे. व्हिडिओ शुट करणारी व्यक्ती महिलांच्या उत्साहाचे कौतूक करताना दिसत आहे. घरच्यांशिवाय किंवा पुरुष व्यक्ती बरोबर नसताना महिला एवढ्या लांब महिला फिरायला आलेल्या बघून छान वाटलं, असेच फिरत राहा असे तो सांगतो.
हेही वाचा – “हा मूर्खपणा थांबवा”, दुर्गापुजेदरम्यान लॅपटॉपवर मिटिंग करतेय ही व्यक्ती, Viral Video पाहून संतापले नेटकरी
व्हिडिओ इंस्टाग्रामवर rz_vlogs नावाच्या पेजवर शेअर केला आहे. व्हायरल व्हिडिओ शेअर करताना कॅप्शनमध्ये लिहिले आहे की, कुटुंबालाच स्वतःच विश्व समजणारी, स्वतः वेळ काढून स्वतःसाठीच वेळ नसणारी एक जिवंत सहनशील मूर्ती म्हणजे स्त्री. कास पठारला गेलो त्यावेळी बीड वरून आलेल्या या महिलांच्या ग्रुपबरोबर भेट झाली. कोणताही पुरुष व्यक्ती बरोबर नसतानाही या सर्वजणी इतक्या लांब आल्या यांच कौतुक वाटलं आणि आपली कौटुंबिक जबाबदारी सांभाळत स्वतःला वेळ दिला त्याबद्दल अभिमानही वाटला. अशीच तुमची मैत्री घट्ट राहो आणि तुम्ही नवनवीन ठिकाण पहावी याच शुभेच्छा”
व्हायरल व्हिडिओ अनेक महिलांना स्वत:साठी जगण्यासाठी प्रेरणा देत आहे. व्हिडिओ नेटकऱ्यांनाही खूप आवडला आहे. व्हिडीओवर कमेंट करत अनेकांन महिलांच्या उत्साहाचे कौतुक केले. एकाने लिहिले, “बाई पण भारी देवा! स्वत:ला वेळ देणे महत्त्वाचे आहे”
एका महिलेने कमेंट करत सांगितले, “आम्ही देखील ९ महिला जम्मु काश्मिरला फिरायला गेलो होतो १५ दिवस”
“पैसे असल्यावर कुठेही जाता येते दादा” अशी कमेंटही एकाने केली.
