Chanakya Niti : सापापेक्षाही जास्त विषारी असतात ‘हे’ लोक; आयुष्यात यशस्वी व्हायचं असेल आजच सोडा मैत्री

१. दुष्ट लोकांपासून राहा खूप दूर

चाणक्य सांगता की, जर एखाद्या वाईट व्यक्तीची तुलना सापाशी केली, तर साप वाईट व्यक्तीपेक्षा जास्त चांगला आहे. कारण- साप तुम्हाला प्रसंगी त्याच्या जीवाला धोका आहे, असे त्याला वाटल्यास किंवा वेळ आल्यावर एकदाच चावतो; परंतु दुष्ट व्यक्ती तुम्हाला प्रत्येक पावलावर नुकसान पोहोचवू शकते. म्हणूनच आपल्या आयुष्यात अशा लोकांना अजिबात महत्त्व देऊ नये. हे लोक तुमच्यासाठी सापापेक्षाही अधिक घातक ठरू शकतात.

२. अशा लोकांशी कोणताही संबंध ठेवू नका

सौंदर्य, तरुणपण आणि उच्च कुळात जन्म घेऊनही जर एखाद्या व्यक्तीमध्ये ज्ञानाची उणीव असेल, तर ती व्यक्ती सुगंध नसलेल्या पळसाच्या फुलासारखी आहे. पळसाचे फूल दिसायला सुंदर असले तरी ते सुगंधाशिवाय निरर्थक आणि शोभून न दिसणारे असते. त्यामुळे कोणत्याही व्यक्तीच्या केवळ बाह्य सौंदर्याला महत्त्व न देता, त्याचा स्वभाव आणि गुण पाहणे अत्यावश्यक आहे.

३. अतिभोळेपणाने राहणे नुकसानदायी ठरते

चाणक्य नीतीनुसार, माणसाने गरजेपेक्षा जास्त सरळ किंवा भोळे असणे योग्य नाही. चाणक्य याबाबत जंगलाचे उदाहरण देतात—जंगलात जी झाडे सरळ असतात, ती सर्वांत आधी तोडली जातात; तर वाकडी-तिकडी झाडे तशीच उभी राहतात. त्याचप्रमाणे चलाख लोक सरळ आणि भोळ्या-भाबड्या लोकांचा गैरफायदा घेतात. म्हणूनच आयुष्यात अतिभोळेपणाने राहणे तुमच्यासाठी नुकसानकारक ठरू शकते.

४. कटकारस्थानी लोकांपासून तातडीने दूर राहा

चाणक्य सांगतात की, सज्जन व्यक्तीने दुराचारी आणि दुष्ट स्वभावाच्या लोकांशी कधीही मैत्री करू नये. आचार्य चाणक्य म्हणतात की, जे लोक इतरांना नुकसान पोहोचवण्यासाठी सतत कारस्थानं रचत असतात, त्यांच्याशी कोणताही संबंध ठेवू नका. कारण- अशा दुर्जनांच्या संगतीचा वाईट परिणाम कधी ना कधी नकळतपणे तुमच्यावरही होऊ शकतो.म्हणूनच शक्य तितक्या लवकर अशा लोकांपासून दूर जा.

(टीप- वरील बातमी प्राप्त माहितीवर आधारित आहे, लोकसत्ता डॉट.कॉम याची पुष्टी करत नाही.)