Cow Survives Train Accident: रेल्वेची धडक म्हणजे जीव वाचण्याची शक्यता अत्यंत कमी, अशी सर्वसाधारण समजूत आहे. विशेषतः रेल्वे रुळांवर एखादा प्राणी किंवा व्यक्ती आल्यास मोठी दुर्घटना घडण्याची भीती असते. मात्र, सध्या सोशल मीडियावर व्हायरल होत असलेल्या एका व्हिडीओने अनेकांना अक्षरशः थक्क केले आहे. भरधाव येणाऱ्या ट्रेनने गाईला जोरदार धडक दिल्यानंतर पुढच्या काही सेकंदांत जे घडलं, ते पाहून उपस्थित लोकांनाही स्वतःच्या डोळ्यांवर विश्वास बसला नाही.
हा व्हिडीओ एका रेल्वे फाटकाजवळील असल्याचे सांगितले जात आहे. नेहमीप्रमाणे फाटक बंद असल्याने दोन्ही बाजूंना वाहनांच्या रांगा लागलेल्या दिसतात. सर्व जण ट्रेन जाण्याची वाट पाहत असतानाच अचानक एक गाय धावत फाटक ओलांडून थेट रेल्वे रुळांवर येते. पुढे काय होणार, याची कल्पना येताच आजूबाजूला उभ्या असलेल्या लोकांच्या काळजाचा ठोका चुकतो.
दरम्यान, समोरून भरधाव वेगाने ट्रेन येत असते. लोको पायलट गाईला सावध करण्यासाठी सलग हॉर्न वाजवतो. मात्र, ट्रेन जवळ आल्याने आणि वेगात असल्याने मोटरमनला ती तत्काळ थांबवणे शक्य होत नाही. काही क्षणांतच ट्रेन गाईला जोरदार धडक देते.
धडकेनंतर गाय रुळांच्या दुसऱ्या बाजूला फेकली जाते. हे दृश्य पाहून उपस्थित लोकांना गाईचा जीव वाचला नसावा, अशी भीती वाटते. काही क्षणांसाठी परिसरात शांतता पसरते. मात्र, त्यानंतर जे घडते, ते पाहून सर्व जण आश्चर्यचकित होतात.
काही सेकंदांनी गाय हळूहळू उठते आणि कोणतीही मोठी दुखापत न झाल्याप्रमाणे ती शांतपणे तेथून चालत निघून जाते. ते दृश्य पाहून उपस्थित लोक सुटकेचा नि:श्वास टाकतात. इतक्या मोठ्या धडकेनंतरही गाय उभी राहिल्याचे पाहून अनेकांनी ती घटना एखाद्या चमत्कारापेक्षा कमी नसल्याची भावना व्यक्त केली.
हा व्हिडीओ @arvind714yadav या इन्स्टाग्राम अकाउंटवरून शेअर करण्यात आला असून, तो मोठ्या प्रमाणात व्हायरल होत आहे. लाखो लोकांनी हा व्हिडीओ पाहिला असून, हजारो जणांनी त्यावर प्रतिक्रिया दिल्या आहेत.
एका नेटकऱ्याने प्रतिक्रिया देताना “ज्याचं कोणी नसतं, त्याचा देव असतो” असे म्हटले. दुसऱ्या एका वापरकर्त्याने “ट्रेनचा वेग तुलनेने कमी असल्यामुळे गाईचा जीव वाचला असावा”, असे मत व्यक्त केले. तर आणखी एका नेटकऱ्याने देवाचे आभार मानत गाईचा जीव वाचल्याबद्दल आनंद व्यक्त केला.
दरम्यान, हा व्हिडीओ पाहताना आणखी एक गोष्ट लक्षात घेणे महत्त्वाचे आहे. सोशल मीडियावर व्हायरल होणारे व्हिडीओ अनेकदा वेगवेगळ्या ठिकाणांचे आणि काळातील असू शकतात. त्यामुळे या घटनेचे नेमके ठिकाण, तारीख किंवा इतर तपशील स्वतंत्रपणे पडताळलेले नाहीत.
रेल्वे रूळ ओलांडणे किंवा बंद फाटकातून जाण्याचा प्रयत्न करणे अत्यंत धोकादायक असते. अशा ठिकाणी नेहमी वाहतूक नियमांचे पालन करणे आणि सुरक्षिततेला प्राधान्य देणे आवश्यक आहे.
येथे पाहा व्हिडीओ
(टीप : ही बातमी सोशल मीडियावर व्हायरल झालेल्या व्हिडीओच्या आधारे तयार करण्यात आली आहे. या व्हिडीओतील घटनेचे ठिकाण आणि इतर तपशील स्वतंत्रपणे पडताळलेले नाहीत.)
