‘महिलांना पुरुषांशी आर्थिक बरोबरी साधण्यासाठी लागणार १७० वर्षे’

जागतिक आर्थिक संघटनेने नुकताच जारी केलेल्या एका अहवालानुसार महिला आणि पुरुष यांच्यातील मिळकतीमध्ये समानता येण्यासाठी आणखी १७० वर्षांचा कालावधी लागणार असल्याचे म्हटले आहे. सर्वत्र स्री-पुरुष समानतेचा नारा गाजत असला तरी स्री-पुरुष समानता अतिशय धीम्यागतीने होत असल्यामुळे महिला आणि पुरुष यांच्यातील मिळकतीची दरी अधिक वाढत असल्याचा उल्लेख या अहवालामध्ये करण्यात आला आहे. त्यामुळे स्री-पुरुष मिळकतीमध्ये निर्माण झालेली दरी २१८६ वर्षापर्यंत भरुन काढणे अशक्य असल्याचे देखील अहवालात म्हटले आहे.

जागतिक आर्थिक संघटनेच्या अहवालानुसार, स्री-पुरुष समानतेच्या पार्श्वभूमीवर २००६ पासून शैक्षणिक क्षेत्रात मोठ्या प्रमाणात विकास झाला आहे. सध्या ९५ देशातील महिलांनी पुरुषांबरोबरीचे शिक्षणाची समानता दिसून येते. पण शिक्षणामध्ये प्रगती करुन देखील नोकरी मिळवणे किंवा उच्चपदावर काम करण्यामध्ये महिलांना म्हणावे तसे यश मिळालेले नाही. परिणामी स्री-पुरुष यांच्यामध्ये आर्थिक असमानता दिसत आहे. शाश्वत विकासासाठी स्री-पुरुष मिळकतीमध्ये देखील समानता आणणे गरजेचे आहे. महिलांना पुरुषांसोबत आर्थिक बरोबरी करण्यासाठी लागणारा कालावधीची शक्यता मागील ११ वर्षातील आकडेवारीनुसार वर्तविण्यात आली आहे.

जिनिव्हा स्थित आर्थिक संघटना २००६ पासूनच्या आकडेवारीनुसार, महिलांच्यातील शिक्षण, आरोग्य, आर्थिक सबलीकरण, लैगिक विषमता, आणि राजकारणातील सशक्तीकरण या क्षेत्रासंबंधीत आभ्यास करत आहे. जागतिक आर्थिक संघटनेच्या अहवालानुसार युरोपमध्ये ४७ वर्षात स्री-पुरुष यांच्यातील वयातील अंतर दुर होणार असल्याची शक्यता वर्तविण्यात आली आहे. तर दक्षिण आशियामध्ये स्री-पुरुष समानेतील गतीमध्ये सुधारणा झाली नाही तर स्री-पुरुष यांच्यातील वयाचे अंतर समान होण्यासाठी १००० पेक्षा अधिकवर्षे लागतील असे संकेत देण्यात आले आहेत.