Fake Toothpaste Factory Raid Viral Video: आपण रोजच्या आयुष्यात वापरत असलेल्या वस्तू किती सुरक्षित आहेत, असा प्रश्न आता उपस्थित झाला आहे. पोलिसांनी नुकताच एका अशा टोळीचा पर्दाफाश केला आहे, जी नामांकित ब्रँड ‘Sensodyne’ च्या नावाखाली चक्क बनावट टूथपेस्ट तयार करत होती. या घटनेचा व्हिडिओ सोशल मीडियावर तुफान व्हायरल झाला असून, ग्राहकांमध्ये भीतीचे वातावरण पसरले आहे.
नेमकं काय घडलं?
दिल्ली पोलिसांनी गुप्त माहितीच्या आधारे एका छुप्या फॅक्टरीवर छापा टाकला. या ठिकाणी अत्यंत अस्वच्छ परिस्थितीत आणि स्वस्त, घातक रसायनांचा वापर करून बनावट टूथपेस्ट तयार केली जात होती. धक्कादायक बाब म्हणजे, ही बनावट टूथपेस्ट अगदी हुबेहूब मूळ ब्रँडसारखी पॅक केली जात होती. जेणेकरून सामान्य ग्राहकांना त्यातील फरक ओळखणे अशक्य होईल. हा केवळ फसवणुकीचा प्रकार नसून लोकांच्या आरोग्याचा खेळखंडोबा करणारा गंभीर गुन्हा आहे.
छाप्यामध्ये काय काय जप्त झाले?
पोलिसांनी दिलेल्या माहितीनुसार, हा कारखाना मोठ्या प्रमाणावर कार्यरत होता. छाप्यात १८०० हून अधिक भरलेल्या बनावट टूथपेस्ट ट्यूब, १०,००० पेक्षा जास्त रिकाम्या ट्यूब, ज्यावर ‘Sensodyne’ चा लोगो होता. जवळपास १२०० पूर्णपणे पॅक केलेले बॉक्स, सुमारे १३० किलो बनावट पेस्ट (मिश्रण).
टूथपेस्ट भरण्यासाठी आणि पॅकिंग करण्यासाठी वापरल्या जाणाऱ्या आधुनिक मशीन्स यावेळी पोलिसांनी जप्त केल्या.
या मोठ्या साठ्यावरून हे स्पष्ट होते की, ही बनावट टूथपेस्ट दिल्लीसह आसपासच्या अनेक राज्यांमधील बाजारपेठांमध्ये पुरवली जात होती.
सोशल मीडियावर प्रतिक्रियांचा पाऊस
या घटनेचा व्हिडिओ एक्सवर आणि इतर सोशल मीडिया प्लॅटफॉर्मवर व्हायरल झाला आहे. व्हिडिओमध्ये ज्या पद्धतीने घाणेरड्या वातावरणात मशीन्सद्वारे टूथपेस्ट तयार होताना दिसत आहे, ते पाहून नेटीझन्स संताप व्यक्त करत आहेत.
एका युजरने कमेंट केली की, “आता रोजच्या वापरातील गोष्टींवर तरी कसा विश्वास ठेवायचा?” तर दुसऱ्याने लिहिले की, “सरकारने अशा लोकांवर कठोर कारवाई करून फाशीची शिक्षा द्यायला हवी, कारण हे लोकांच्या जीवाशी खेळत आहेत.” अनेक नागरिक आता बनावट आणि खऱ्या वस्तूंमधील फरक कसा ओळखायचा, याबाबत चिंता व्यक्त करत आहेत.
ग्राहकांनी काय काळजी घ्यावी?
तज्ज्ञांच्या मते, कोणतीही वस्तू खरेदी करताना त्याचे पॅकेजिंग नीट तपासावे. पॅकेटवरील स्पेलिंगमधील चुका, होलोग्रामची अनुपस्थिती किंवा अत्यंत कमी किंमत ही बनावट वस्तूची लक्षणे असू शकतात. नेहमी अधिकृत विक्रेत्याकडूनच वस्तू खरेदी करण्याचे आवाहन प्रशासनाकडून करण्यात येत आहे.
