गेल्या काही दिवसांत महिलांविरोधातील अत्याचाराच्या आणि छेडछाडीच्या अत्यंत धक्कादायक घटना समोर आल्या आहेत. सार्वजनिक ठिकाणी महिला किती सुरक्षित आहेत, असा गंभीर प्रश्न या घटनांमुळे पुन्हा एकदा ऐरणीवर आला आहे. महिलांचा पाठलाग करणे आणि विनयभंग करण्याचे प्रकार उघडकीस आले आहेत. इतकेच नव्हे, तर कायद्याचा कसलाही भिती न बाळगता भररस्त्यात महिलांवर अश्लील शेरेबाजी करण्याचे धाडस हे विकृत करतात.
प्रशासनाकडून महिला सुरक्षेचे मोठे दावे केले जात असले, तरी प्रत्यक्षात मात्र महिलांना रोजच्या प्रवासात आणि कामाच्या ठिकाणी नाहक मनस्ताप व असुरक्षिततेचा सामना करावा लागत आहे. अशाच एका गंभीर प्रवृत्तीला चपराक देणारी आणि कायदा-सुव्यवस्थेच्या स्थितीवर बोट ठेवणारी एक संतापजनक घटना नुकतीच समोर आली आहे, जिथे एका व्यक्तीने एका गजबजलेल्या रस्त्यावर एका महिलेबरोबर अश्लील कृत्य केले पण पुढे जे घडले त्याची कल्पना कोणी केली नसेल. ती कोणी सामान्य महिला नव्हे तर एक महिला पोलीस कॉन्स्टेबल होती. तिने त्या विकृताची थेट कॉलर पकडली अन् जवळच्या पोलीस ठाण्यात नेले आणि तिथे त्याच्याविरुद्ध अधिकृत तक्रार दाखल केली.
ही घटना सोमवारी दुपारी ‘बीटी रोड’वर घडली. महिला कॉन्स्टेबलने संशयित व्यक्तीला ओढत पोलीस ठाण्याकडे नेल्यामुळे तेथील प्रवाशांचे आणि स्थानिक रहिवाशांचे लक्ष या घटनेकडे वेधले गेले.
गजबजलेल्या रस्त्यावर छेडछाडीचा प्रकार
तक्रारीनुसार, ती महिला तिच्या स्कूटरवरून जात असताना आरोपीने तिला आपले गुप्तांग दाखवले, अश्लील हावभाव केले आणि आक्षेपार्ह शेरेबाजी केली. या घटनेकडे दुर्लक्ष करून किंवा तिथून निघून जाण्याऐवजी, तिने त्वरित त्या व्यक्तीला जाब विचारला.
त्या प्रसंगाची आठवण सांगताना कॉन्स्टेबल म्हणाल्या, “त्या माणसाने मला आपले गुप्तांग दाखवले.”
परिस्थितीचे गांभीर्य ओळखून, तिने त्या संशयिताची कॉलर पकडली आणि त्याला पळून जाण्यापासून रोखले.
कॉन्स्टेबलने संशयिताला सुमारे ४०० मीटरपर्यंत ओढत नेले
त्यानंतर त्या महिलेने आरोपीला चालवत जवळच्या ‘खर्दाह पोलीस ठाण्या’पर्यंत नेले; हे अंतर सुमारे ४०० मीटर होते. बीटी रोडसारख्या गजबजलेल्या रस्त्यावर घडलेल्या या घटनेमुळे तिथे गर्दी जमली. पादचारी आणि वाहनचालक पाहत असतानाच, तिने त्या व्यक्तीला पळून न देता ठामपणे पोलीस ठाण्यापर्यंत नेले.
ही घटना पाहणाऱ्या एका स्थानिक दुकानदाराने सांगितले की, पोलीस कॉन्स्टेबलने संपूर्ण वाटेत त्या संशयितावर आपली पकड घट्ट ठेवली होती; हे पाहून वाटेत जमलेले अनेक लोक आश्चर्यचकित झाले.
आरोपीची ओळख पटली आणि त्याला ताब्यात घेतले
पोलिसांनी नंतर आरोपीची ओळख आकाश घोष अशी पटवली, जो डिलिव्हरी एजंट म्हणून काम करतो. पोलीस ठाण्यात आणल्यानंतर, महिला कॉन्स्टेबलने दाखल केलेल्या तक्रारीच्या आधारे त्याला ताब्यात घेण्यात आले.
पोलिसांनी कायदेशीर कारवाई सुरू केली असून या प्रकरणाचा तपास सुरू आहे.
