IIT Baba Abhay Singh Marriage : महाकुंभमेळ्यामुळे व्हायरल झालेल्या आयआयटी बाबाचं लग्न, जाणून घ्या कोण आहे अभय सिंहची पत्नी?

कोण आहे अभय सिंहची पत्नी प्रतीका?

अभय सिंह उर्फ आयआयटी बाबाच्या पत्नीचं नाव प्रतीका आहे. ती कर्नाटकमध्ये राहते. आयआयटी बाबाची पत्नीही इंजिनिअर आहे. एका वेबसाइटला दिलेल्या मुलाखतीत प्रतीकाने सांगितलं की एक वर्षापूर्वी तिची आणि अभयची भेट झाली. मला अभयचा स्वभाव खूपच आवडला. त्यानंतर आम्ही लग्न करण्याचा निर्णय घेतला. आता आम्ही आमच्या सासू-सासऱ्यांना भेटायला झज्जरला आलो आहोत. आता आम्ही सनातन विद्यापीठ सुरु करण्याचा विचार करतो आहोत असंही प्रतीकाने सांगितलं.

कोण आहे अभय सिंह उर्फ आयआयटी बाबा?

महाकुंभमेळ्यात आयआयटी बाबा नावाचा तरुण साधू प्रसिद्ध झाला होता.सोशल मीडियावर त्याच्या नावाची चर्चा होती. अभयचा जन्म हरियाणातील झज्जरमध्ये झाला. त्याने सुरुवातीचं शिक्षण हे हरियाणात घेतलं होतं. १२ वीनंतर त्याने आयआयटी जेईईची तयारी केली. त्यानंतर २००८ मध्ये अभय सिंह आयआयटी जेईई मध्ये ऑल इंडिया रँक ७३१ मिळवली. त्यानंतर आयआयटी मुंबईतून एयरोस्पेस इंजिनिअरींगलाही त्याने प्रवेश घेतला होता. कॅनडातील एअरक्राफ्ट तयार करणाऱ्या कंपनीत तो नोकरीही करु लागला होता. कोव्हिड काळात लॉकडाऊन लागला तेव्हा अभय भारतात परतला होता. त्यावेळी त्याने सांगितलं की वर्षाला ३५ लाख रुपयांचं पॅकेज असलेली नोकरी सोडून आपण भारतात परतलो आहोत. अभयचे वडील वकील आहेत. तर त्याची आई गृहिणी आहे. कुंभमेळ्यात अभयची ओळख आयआयटी बाबा अशी झाल्याने तो रातोरात प्रसिद्ध झाला होता. आता त्याच्या लग्नाची बातमी समोर आली आहे. टाइम्स ऑफ इंडियाने हे वृत्त दिलं आहे.

सोशल मीडियावर फोटो आणि व्हिडीओ व्हायरल

महाकुंभमेळा सुरु होईपर्यंत अभय सिंहला कुणीही फारसं ओळखत नव्हतं. मात्र कुंभमेळा सुरु झाला आणि रातोरात आयआयटी बाबा म्हणून त्याला प्रसिद्धी मिळाली. महाकुंभातील जुना आखाडाशी हा आयआयटी बाबा संलग्न आहे. आयआयटीमध्ये शिक्षण घेतलं, लाखो रुपयांचं पॅकेज असलेली नोकरी सोडली हे सांगत आपण साधू कसे झालो हे जेव्हा अभयने सांगितलं होतं तेव्हा त्याची बरीच चर्चा रंगली होती. आता त्याच्या लग्नाची चर्चाही सोशल मीडियावर चांगलीच रंगली आहे. अभय आणि प्रतीका यांच्या लग्नाचे फोटो सोशल मीडियावर व्हायरल झाले आहेत.