Emotional Viral Video: सोशल मीडियाच्या काळात दररोज हजारो व्हिडीओ व्हायरल होत असतात, पण काही व्हिडीओ असे असतात जे फक्त पाहिले जात नाहीत, तर मनात खोलवर घर करून जातात. नात्यांमधील भावना, आठवणी आणि आयुष्यातील हळवे क्षण जेव्हा एका छोट्याशा व्हिडीओतून समोर येतात, तेव्हा तो फक्त व्हिडीओ राहत नाही, तर अनेकांच्या वैयक्तिक अनुभवांशी जोडला जातो. आई-वडिलांशी असलेले नाते, त्यांचं निःस्वार्थ प्रेम आणि त्यांची येणारी आठवण या भावना प्रत्येकाला कधीतरी स्पर्श करून जातात. सध्या सोशल मीडियावर असा एक भावनिक व्हिडीओ चर्चेत आहे, ज्याने हजारो लोकांना आपल्या आईच्या आठवणींमध्ये हरवायला भाग पाडले आहे.
इंडिगो एअरलाईन्सचे पायलट प्रदीप कृष्णन यांनी त्यांच्या आईच्या आठवणीत एक भावनिक व्हिडीओ सोशल मीडियावर शेअर केला आहे. त्यांनी या व्हिडीओला त्यांच्या आयुष्यातील “सर्वात कठीण एडिट” असे म्हटले आहे. व्हिडीओच्या सुरुवातीला प्रदीप फ्लाइटमध्ये अनाउन्समेंट करताना दिसतात आणि प्रवाशांमध्ये बसलेली त्यांची आई अभिमानाने हसताना दिसते.
काही क्षणांनंतर व्हिडीओ भावनिक होतो, जिथे विमानातून उतरत असलेली त्यांची आई आकाशात एंजलच्या रूपात दाखवली जाते आणि स्क्रीनवर ‘माझी रक्षक, माझी एंजल’ असा संदेश दिसतो. पोस्टमध्ये प्रदीप यांनी लिहिले की, ते आधी कधी देवावर विश्वास ठेवत नव्हते, पण आता त्यांच्या आयुष्यात प्रार्थना करण्यासाठी एक ‘देव’ आहे, त्यांची आई. त्यांनी आईच्या आठवणी सांगताना नमूद केले की, ती आपल्या हातचे डोसे आणि कॉफी खाऊ घातल्याशिवाय कोणालाही घरातून जाऊ देत नसे आणि आयुष्य साधेपणाने, दयाळूपणे आणि अहंकाराशिवाय जगण्याची शिकवण तिने दिली.
पाहा व्हिडीओ
हा व्हिडीओ व्हायरल झाल्यानंतर भावनिक प्रतिक्रिया लोकांनी दिल्या. अनेकांनी प्रदीप यांना धीर देत त्यांच्या आईच्या आठवणींना श्रद्धांजली वाहिली. एका युजरने लिहिले की, “आता तुम्ही जेव्हा ढगांमध्ये उड्डाण कराल, तेव्हा तुमची आई तिथूनच तुमच्याकडे हसत असेल.” तर दुसऱ्या एका युजरने म्हटले की, पालकांचे प्रेम आणि आशीर्वाद मृत्यूनंतरही आपल्या आयुष्याभोवती संरक्षण कवचासारखे राहतात.
अनेकांनी हा व्हिडीओ पाहताना स्वतःच्या आई-वडिलांच्या आठवणी जाग्या झाल्याचे सांगितले. भावनांनी भरलेला हा व्हिडीओ केवळ एका मुलाची आईसाठीची श्रद्धांजली नसून, आई या शब्दामागील प्रेम आणि जिव्हाळा पुन्हा एकदा सर्वांना जाणवून देणारा ठरला आहे.
