बापरे! खतरनाक प्लॅन; ५ तास पाण्याखाली लपला कुख्यात चोर, पोलिसांना वाटला तो मेला… पण कमळाच्या देठाचा ‘असा’ जुगाड पाहून सर्वच थक्क, पाहा VIDEO

हा आरोपी हरविंदर सिंग (वय ३२), उत्तर प्रदेशातील बिजनौर येथील रहिवासी असल्याचे स्पष्ट झाले आहे. रेल्वे पोलिसांच्या माहितीनुसार, तो देशभरातील शेकडो रेल्वे चोरी प्रकरणांमध्ये संशयित होता. तब्बल ५०० पेक्षा अधिक चोरीच्या घटनांमध्ये त्याचा सहभाग असल्याचा संशय तपास यंत्रणांना आहे.

ट्रेनमध्ये चोरीचा संशय… आणि सुरू झाला थरारक पाठलाग

ही घटना ६ एप्रिलच्या पहाटे मध्य प्रदेशातील सिहोरा रेल्वेस्थानकावर घडली. RPF जवानांना एका व्यक्तीच्या हालचाली संशयास्पद वाटल्या. तो ट्रेनमधून उतरून झपाट्याने स्टेशनबाहेर जाण्याचा प्रयत्न करत होता. काही क्षणांपूर्वीच त्याने एका महिलेची पर्स चोरल्याची माहितीही समोर आली होती.

पोलिसांनी त्याचा पाठलाग सुरू केला आणि काही क्षणांतच तो जवळच्या बाजार परिसराकडे धावत गेला. तेथे असलेल्या शेवाळाने भरलेल्या तलावाजवळ पोहोचून त्याने अचानक पाण्यात उडी घेतली.

पाण्याखाली ५ तासांचा थरार… कमळाच्या देठातून श्वास!

यानंतर जे घडलं ते ऐकून तपास अधिकारीही थक्क झाले. आरोपी पाण्याखाली लपून बसला आणि कमळाच्या पोकळ देठाचा वापर करून तो हवेतून श्वास घेत राहिला. तब्बल ५ तास तो पाण्यात लपून बसला होता.

पोलिसांनी मात्र तलावाला पूर्ण घेराव घातला. तो बाहेर येईल या आशेने संपूर्ण परिसरात कडक नजर ठेवण्यात आली. स्थानिक पोलिसांना बोलावण्यात आले आणि नंतर गोताखोरांना तलावात उतरवण्यात आले.

अखेर सापडला ‘अदृश्य चोर’

कडक शोध मोहिमेनंतर अखेर आरोपीला पाण्यातून बाहेर काढण्यात आले. मात्र, आश्चर्य म्हणजे बाहेर काढल्यानंतरही त्याने पळून जाण्याचा प्रयत्न केला, पण RPF जवानांनी मोठ्या प्रयत्नांनी त्याला पुन्हा पकडले. या झटापटीत काही जवान किरकोळ जखमीही झाले.

देशभरातील शेकडो गुन्ह्यांचा संशय

तपासात समोर आलेल्या माहितीनुसार, हरविंदर सिंगवर देशभरात २१ पेक्षा अधिक गुन्हे दाखल आहेत. तो उत्तर ते दक्षिण भारतापर्यंत रेल्वे प्रवाशांना लक्ष्य करत असे. प्रवाशांकडून सोनं, रोख रक्कम, दागिने आणि इतर मौल्यवान वस्तू चोरी करणे हा त्याचा मुख्य उद्देश होता.

तो एसी कोचमध्ये वैध तिकीट घेऊन बसायचा, प्रवासी झोपल्यानंतर चोरी करून मधल्या स्थानकांवर उतरायचा, अशी त्याची पद्धत होती.

एका प्रकरणात तर त्याच्यावर परवानाधारक पिस्तूल आणि दारूगोळा चोरी केल्याचाही आरोप आहे.

राजकीय पार्श्वभूमीही समोर

आश्चर्यकारक बाब म्हणजे, हरविंदर सिंग हा २०१७ मध्ये बिजनौरमधील हल्दौर नगरपालिकेत नगरसेवक म्हणून निवडून आला होता. २०१८ मध्ये आंध्र प्रदेश पोलिसांनी त्याला अटक केली होती, तेव्हा त्याच्याकडून सोनं आणि हिरेही जप्त करण्यात आले होते.

ऑपरेशन ‘यात्री सुरक्षा’ अंतर्गत मोठी कारवाई

ही संपूर्ण कारवाई RPF च्या “ऑपरेशन यात्री सुरक्षा” अंतर्गत पार पडली. अखेर आरोपीला न्यायालयात हजर करण्यात आले असून पुढील तपास GRP भोपाळकडे सोपवण्यात आला आहे.

अजूनही अनेक प्रश्न अनुत्तरित…

पण सर्वात मोठा प्रश्न अजूनही कायम आहे…
पाच तास पाण्याखाली राहून कमळाच्या देठातून श्वास घेणारा हा आरोपी खरोखर इतका हुशार होता का? की त्याच्या मागे अजून मोठं जाळं दडलेलं आहे?

येथे पाहा व्हिडीओ

तपास यंत्रणा आता याच दिशेने पुढे जात आहेत… आणि या ‘अदृश्य चोराच्या’ कहाणीत अजूनही अनेक धक्कादायक खुलासे होण्याची शक्यता आहे!