Lata Mangeshkar Last Song On Desh Bhakti: काही आवाज असे असतात, जे कानावर पडताच मनात देशप्रेम, आपुलकी आणि असंख्य आठवणी जाग्या होतात. गानसम्राज्ञी लता मंगेशकर यांचा आवाजही असाच होता. त्यांच्या सुरेल आवाजाने तब्बल सात दशकांहून अधिक काळ रसिकांच्या मनावर अधिराज्य गाजवणाऱ्या लता दीदींनी हजारो गाण्यांना अजरामर केलं. आजही त्यांची गाणी तितकीच लोकप्रिय आहेत. पण तुम्हाला माहिती आहे का, जगाचा निरोप घेण्यापूर्वी लता मंगेशकर यांनी नेमकं कोणतं शेवटचं गाणं रेकॉर्ड केलं होतं? विशेष म्हणजे या गाण्याचा संबंध पंतप्रधान नरेंद्र मोदी यांच्याशीही जोडला गेला आहे.
हे होतं लता दीदींचं शेवटचं रेकॉर्ड केलेलं गाणं
लता मंगेशकर यांनी ३० मार्च २०१९ रोजी ‘सौगंध मुझे इस मिट्टी की’ हे देशभक्तीपर गीत रेकॉर्ड केलं होतं. प्रकृती अस्वास्थ्यामुळे त्यानंतर त्यांनी गायनापासून जवळपास पूर्णपणे दूर राहण्याचा निर्णय घेतला. या गाण्याची सुरुवात लता मंगेशकर यांच्या आवाजाने होते. त्यानंतर गायक सुखविंदर सिंह यांचा आवाज ऐकायला मिळतो. त्यामुळे हे गाणं लता दीदींच्या कारकिर्दीतील शेवटच्या रेकॉर्डिंगपैकी एक म्हणून विशेष मानलं जातं. देशभक्तीची भावना जागवणाऱ्या या गीतामुळे लता दीदींच्या आवाजातील शेवटच्या सुरांना एक वेगळीच भावनिक किनार मिळाली.
नरेंद्र मोदींशी काय आहे या गाण्याचं कनेक्शन?
‘सौगंध मुझे इस मिट्टी की’ हे गाणं पुढे पंतप्रधान नरेंद्र मोदी यांच्या जीवनावर आधारित ‘पीएम नरेंद्र मोदी’ या चित्रपटाशी जोडले गेले. त्यामुळे लता मंगेशकर यांच्या शेवटच्या रेकॉर्डिंगला आणखी एक खास संदर्भ मिळाला. लता मंगेशकर आणि नरेंद्र मोदी यांच्यातील स्नेह आणि परस्पर आदराची चर्चाही अनेकदा झाली आहे. त्यामुळे लता दीदींच्या शेवटच्या रेकॉर्डिंगपैकी एक असलेल्या या देशभक्तीपर गीताचा मोदींच्या बायोपिकशी असलेला संबंध निश्चितच खास आहे.
१३व्या वर्षी सुरू झालेला सुरांचा प्रवास!
लता मंगेशकर यांनी वयाच्या अवघ्या १३व्या वर्षी १९४३ मध्ये आपल्या गायन कारकिर्दीला सुरुवात केली. ‘गजाभाऊ’ या चित्रपटातील ‘माता एक सपूत की दुनिया बदल दे तू’ हे त्यांच्या सुरुवातीच्या गाण्यांपैकी एक मानलं जातं. यानंतर भारतीय संगीतविश्वात त्यांच्या आवाजाचा जादुई प्रवास सुरू झाला. हिंदीसह विविध भारतीय भाषांमध्ये त्यांनी असंख्य गाणी गायली. प्रेमगीतं असोत, विरहगीतं असोत किंवा देशभक्तीपर गाणी यापैकी कुठल्याही गाण्याला लता दीदींच्या आवाजाने प्रत्येक भावनेला वेगळी उंची दिली.
७ दशकांपेक्षा मोठी कारकीर्द, पण आवाज आजही अमर
लता मंगेशकर यांनी आपल्या प्रदीर्घ कारकिर्दीत हजारो गाण्यांना आवाज दिला आणि भारतीय संगीतविश्वावर अमिट छाप सोडली. त्यांच्या आवाजाची जादू अशी होती की अनेक दशकांपूर्वी प्रदर्शित झालेली गाणी आजच्या पिढीलाही तितकीच भावतात.
कोरोना आणि न्यूमोनियानंतर त्यांची प्रकृती खालावली आणि ६ फेब्रुवारी २०२२ रोजी वयाच्या ९२व्या वर्षी त्यांनी अखेरचा श्वास घेतला.
लता दीदी आज आपल्यात नसल्या तरी त्यांचा आवाज मात्र कायम जिवंत आहे. ‘सौगंध मुझे इस मिट्टी की’मधील त्यांचा शेवटचा स्वर असो किंवा त्यांच्या कारकिर्दीतील हजारो अजरामर गाणी लता मंगेशकर यांचा आवाज भारतीय संगीताच्या इतिहासात कायमचा अमर राहणार आहे.
