या माणसाने झोपण्यासाठी अशी जागा निवडली की पाहता पाहता गर्दी जमा झाली; VIDEO पाहून तुम्हालाही वाटेल आश्चर्य

हा व्हिडीओ बेंगळुरूमधील जलाहल्ली क्रॉस उड्डाणपूल परिसरातील आहे. उड्डाणपुलामध्ये बांधलेल्या एका मोठ्या पोकळ काँक्रीटच्या खांबाच्या आत एक व्यक्ती झोपलेली दिसत आहे, जी गादीसारखी जागा बनवते. हा खांब अरुंद, उंच आहे आणि तिथपर्यंत सहज पोहोचता येत नाही. मग हा माणूस इतक्या कठीण ठिकाणी कसा पोहोचला, हा प्रश्न व्हिडीओ पाहणाऱ्या प्रत्येकाच्या मनात निर्माण झाला आहे.

व्हिडीओमध्ये दिसते की, रस्त्याने जाणारे लोक आणि वाहनं अचानक हळू होऊ लागतात. काही जण थांबून वर बोट दाखवत इतरांना काही दाखवत आहेत. कॅमेरा झूम इन करताच, उड्डाणपुलाच्या खोबणीत एक व्यक्ती शांतपणे झोपलेली दिसते. तिच्याभोवती एक बॅग आणि काही वस्तू ठेवल्या आहेत. रस्त्यावर लोकांच्या कुजबुजीने आणि आवाजानेही तिला काही फरक पडत नाही. ती पूर्णपणे निवांत आणि जगापासून तुटलेली असल्यासारखी दिसते.

पाहा व्हिडिओ

काही क्षणातच हे अनोखे दृश्य पाहण्यासाठी लोकांची एक छोटीशी गर्दी जमते. काही जण पहिल्यांदाच ते पाहून आश्चर्यचकित होतात, काही जण चिंता व्यक्त करतात आणि काही जण त्यांचे मोबाईल फोन काढून व्हिडीओ बनवू लागतात. काही वाहनचालकही थांबून याचे चित्रीकरण करत असल्याने थोडावेळ वाहतूकही मंदावली.

हा व्हिडीओ ट्विटर @karnatakaportf या अकाउंटवरून पोस्ट करण्यात आला आहे. हा व्हिडीओ व्हायरल होताच त्याला बेंगळुरू सिटी पोलिस आणि नगरपालिकेच्या अधिकाऱ्यांना टॅग करून शेअर करण्यात आले. नागरिकांनीही या घटनेवर मोठ्या प्रमाणात प्रतिक्रिया दिल्या.
“ही जागा किती धोकादायक आहे! माणूस खाली पडला तर जीवाला मोठा धोका आहे.”

तर दुसऱ्याने म्हटले “त्या व्यक्तीला बेघर असल्यास, तातडीने मदत मिळायला हवी.” तर तिसऱ्याने म्हटले “अशी ठिकाणे सहज उपलब्ध कशी होतात? सुरक्षा का नाही?” “पोलिसांनी लगेच येऊन त्या व्यक्तीला सुरक्षित ठिकाणी नेले पाहिजे.” काही नागरिकांनी अत्यंत सकारात्मक भावनेने त्या व्यक्तीपर्यंत अधिकाऱ्यांनी लवकरात लवकर मदत पोहोचवावी, अशी मागणी केली; तर काहींनी शहरातील बेघर लोकांच्या परिस्थितीवर प्रश्न उपस्थित करत प्रशासनाने ठोस उपाययोजना कराव्यात असेही म्हटले.