VIDEO: मासे पकडण्याचं स्वप्न… पण जाळ्यात अडकली थेट मगर! ७ वर्षांच्या मुलाबरोबर नदीत घडलं असं काही की पाहणाऱ्यांच्याही अंगावर आला काटा

“जाळ्यात काहीतरी मोठं अडकलंय…” आणि पुढच्याच क्षणी किंकाळी

व्हायरल होत असलेल्या या व्हिडीओमध्ये सुरुवातीला सर्व काही सामान्य दिसतं. लहान मुलगा नदीच्या मध्यभागी होडीत उभा असतो. त्याचा एक साथीदार त्याचा व्हिडीओ शूट करत असतो. मुलगा मोठ्या आनंदानं जाळं नदीत फेकतो. काही क्षणांनी जाळं जड झाल्याचं त्याला जाणवतं आणि तो उत्साहानं ते जाळं ओढू लागतो. त्याला वाटलं की, मोठा मासा अडकला असावा; पण जसंजसं जाळं पाण्याबाहेर येऊ लागलं, तसतसा एक भयानक चेहरा दिसू लागला… आणि पुढच्या क्षणी पाण्यातून मगरीचं मोठं डोकं बाहेर आलं. ते दृश्य पाहताच मुलाच्या चेहऱ्यावरचा आनंद क्षणात गायब झाला. त्याच्या तोंडातून जोरदार किंकाळी बाहेर पडली आणि तो घाबरून होडीत मागे सरकू लागला.

आनंदाचं रूपांतर क्षणात भीतीत

व्हिडीओमध्ये स्पष्ट दिसतं की, मगर जाळ्यात अडकलेली असूनही खूप मोठ्या प्रमाणात हालचाल करीत होती. त्या वेळी जर मगरीनं अचानक हल्ला केला असता, तर मोठी दुर्घटना घडू शकली असती, अशी चर्चा आता सोशल मीडियावर सुरू आहे. हा व्हिडीओ वेगानं व्हायरल होत असून, अनेक जण त्याबाबत लिहीत आहेत – “मासा पकडायला गेलेल्या मुलाच्या जाळ्यात थेट मृत्यूच अडकला.” काही लोक मुलाच्या धाडसाचं कौतुक करत आहेत; तर अनेक जण एवढ्या लहान मुलाला नदीत एकटं पाठवल्याबद्दल पालकांबाबत प्रश्न उपस्थित करीत आहेत.

नद्यांमध्ये वाढताहेत मगरींचे हल्ले?

तज्ज्ञांच्या मते, उत्तर प्रदेश, मध्य प्रदेश, छत्तीसगड, बिहार व बंगालमधील अनेक नद्यांमध्ये मगरींची संख्या वाढत असल्याचे दिसून येत आहे. उन्हाळ्यात पाण्याची पातळी कमी झाल्यामुळे मगरी नदीकाठच्या भागात अधिक सक्रिय होतात. विशेषतः मासेमारी करणाऱ्या कुटुंबांमध्ये लहान मुलंही त्यांच्या खेळण्या-बागडण्याच्या वयातच पालकांना त्यांच्या कामात मदत करू लागतात. मात्र, अशा भागात मुलांना एकट्यानं नदीकाठी पाठवणं धोकादायक ठरू शकतं, असा इशारा वेळोवेळी प्रशासन आणि वन विभागाकडून दिला जात असतो.

नेमका व्हिडीओ कुठला?

हा व्हिडीओ नेमका कुठल्या राज्यातील आहे, याची अद्याप अधिकृत पुष्टी झालेली नाही. काही सोशल मीडिया युजर्सच्या मते, ही घटना पूर्व भारतातील एखाद्या नदी परिसरातील असू शकते, जिथे मगरी मोठ्या प्रमाणात आढळतात. वन विभागाच्या अधिकाऱ्यांनी सांगितलं आहे की, व्हिडीओ अलीकडचा असल्यास संबंधित भागात चौकशी केली जाऊ शकते आणि त्यानुसार स्थानिकांना अधिक सतर्क राहण्याचा इशाराही दिला जाईल.

येथे पाहा व्हिडीओ