व्हायरल होण्यासाठी प्रवाशांच्या जीवाशी खेळ! वंदे भारत ट्रेन थांबवण्यासाठी तरुणांनी हद्द पार केली; VIDEO पाहून धक्का बसेल

व्हिडीओत दिसतंय त्याप्रमाणे काही तरुण रेल्वे रूळांवर लाकडी ओंडके ठेवून अगदी हसत-खेळत वंदे भारत ट्रेन थांबवण्याची तयारी करत आहेत. मग वेगाने येणारी वंदे भारत एक्स्प्रेस रूळांवर थांबते. लोको पायलट पोलिस कॉन्स्टेबलही काही क्षणासाठी गोंधळात पडतात. सुरुवातीला त्यांना वाटते की या तरुणांच्या ग्रुपला ट्रेनमध्ये चढायचं आहे, पण मग पुढे तरुणांचा ग्रुप कॅमेऱ्यावर सांगतो की, ट्रेनमध्ये चढण्यासाठी नाही तर फक्त काही लाईक्स आणि व्ह्युजसाठी हा सर्व प्रकार सुरू आहे; यामुळे सार्वजनिक सुरक्षेबाबत तीव्र संताप आणि चिंता व्यक्त होत आहे. अनेक युजर्सनी रेल्वे मंत्री अश्विनी वैष्णव, रेल्वे संरक्षण दल (आरपीएफ) आणि रेल्वे मंत्रालयाला टॅग करून त्या तरुणांवर कठोर कारवाई करण्याची मागणी केली आहे.

सोशल मीडियावर व्हायरल होणारा हा व्हिडीओ @SouleFacts या इन्स्टाग्राम अकाउंटवरून शेअर करण्यात आला आहे. “रील्स बनवण्यासाठी लाकडी ओंडके ठेवून वंदे भारत थांबवणे आणि प्रवाशांचा जीव धोक्यात घालणे, याला दहशतवादी कृत्य (act of terrorism) मानले पाहिजे. मी @RailMinIndia आणि @RPF_INDIA यांना विनंती करतो की त्या सर्वांना अटक करावी आणि राज्य सरकारशी समन्वय साधून त्यांच्यावर एनएसए (राष्ट्रीय सुरक्षा कायदा) लावावा”; अशी कॅप्शन व्हिडीओला देण्यात आली आहे.

व्हिडीओ नक्की बघा…

व्हिडीओ पाहून केंद्रीय गृहमंत्री अमित शाह यांना टॅग करून एका युजरने लिहिले, “अशा कृत्यांवर यूएपीए अंतर्गत कारवाई केली पाहिजे. कृपया हा बदल करा आणि अशा सर्व प्रकरणांवर कारवाई सुरू करा. त्यांना जामीन न देता तुरुंगात सडू द्या”, “सर्वात दुःखद गोष्ट ही आहे की, सर्व पुरावे असूनही त्यांना कोणताही परिणाम भोगावा लागणार नाही आणि ते लवकरच पुन्हा असेच करतील”, “‘व्ह्युजसाठी लाज सोडली” आदी अनेकविध कमेंट्स नेटकरी करताना दिसत आहेत. घटनेचे नेमके ठिकाण आणि तारीख अज्ञात असली तरीही या व्हिडीओवर तीव्र टीका होत आहे.