Worker Eats Biscuits Dipped in Water Video Goes Viral: दिवसभर कष्ट करूनही अनेकांना दोन वेळचे पोटभर अन्न मिळत नाही, हे वास्तव आपण अनेकदा ऐकतो. मात्र, कधी कधी एखादा व्हिडीओ हे वास्तव इतक्या जिवंतपणे समोर आणतो की तो पाहिल्यानंतर शब्दही सुचत नाहीत. सध्या सोशल मीडियावर असाच एक भावनिक व्हिडीओ प्रचंड वेगाने व्हायरल होत असून, तो पाहून अनेकांच्या डोळ्यांत अश्रू तरळले आहेत.
या व्हिडीओत एका मजुराची साधी कृती दिसते. पण, त्यामागे दडलेली गरिबी, संघर्ष आणि आयुष्याशी सुरू असलेली झुंज अनेकांना विचार करायला भाग पाडत आहे. अनेकांनी हा व्हिडीओ पाहिल्यानंतर ‘गरिबी माणसाला काय काय दाखवते’ अशी प्रतिक्रिया व्यक्त केली आहे.
पाण्यात बुडवून बिस्कीट खाताना दिसला मजूर
व्हायरल होत असलेल्या व्हिडीओमध्ये एक मजूर मोठ्या पाण्याच्या ड्रमजवळ उभा असल्याचे दिसते. त्याच्या हातात बिस्किटांचे छोटे पाकीट असते. काही क्षणांनी तो ड्रममधून वाहणाऱ्या पाण्यात एक-एक बिस्किट बुडवतो आणि शांतपणे खाऊ लागतो.
या संपूर्ण प्रसंगात सर्वांत लक्ष वेधून घेणारी गोष्ट म्हणजे, त्याच्या चेहऱ्यावरचे समाधान. पोटाची भूक भागवण्यासाठी तो पाण्यात बिस्कीट भिजवत असला तरी चेहऱ्यावर कोणतीही तक्रार किंवा नाराजी दिसत नाही. उलट हलकीशी स्मितरेषा कायम असते. त्याचवेळी काही अंतरावर उभी असलेली एक व्यक्ती मोबाईलमध्ये हा संपूर्ण प्रसंग चित्रित करत असते.
व्हिडीओमध्ये मजूर एकामागून एक बिस्किटे पाण्यात बुडवून खात राहतो आणि काही क्षणांत व्हिडीओ संपतो. मात्र, हा छोटासा प्रसंग लाखो लोकांच्या मनात मोठा प्रश्न निर्माण करून जातो.
फक्त बिस्कीट खाण्याचा व्हिडीओ नाही, तर संघर्षाची कहाणी
अनेक सोशल मीडिया वापरकर्त्यांच्या मते हा व्हिडीओ केवळ एका मजुराचा नाही, तर हजारो कष्टकरी कामगारांच्या आयुष्याचा आरसा आहे. घर चालवण्यासाठी, कुटुंबाचे पोट भरण्यासाठी आणि मुलांच्या भविष्यासाठी अनेक मजूर स्वतःच्या गरजा बाजूला ठेवतात. वेळेअभावी किंवा परिस्थितीमुळे अनेकदा त्यांना पोटभर जेवणही मिळत नाही. अशा वेळी बिस्कीट किंवा इतर साध्या पदार्थांवरच त्यांना भूक भागवावी लागते.
यामुळेच हा व्हिडीओ अनेकांच्या मनाला भिडला असून तो संघर्ष, त्याग आणि वास्तवाची जाणीव करून देणारा असल्याचे अनेकांचे मत आहे.
नेटकऱ्यांच्या प्रतिक्रिया भावूक करणाऱ्या
हा व्हिडीओ व्हायरल झाल्यानंतर त्यावर मोठ्या प्रमाणात प्रतिक्रिया उमटल्या आहेत. एका नेटकऱ्याने लिहिले, ‘मुलांच्या भविष्यासाठी आई-वडील किती मोठा त्याग करतात याची किंमत शब्दांत मोजता येत नाही.’
दुसऱ्या एका वापरकर्त्याने म्हटले की, कामाचा ताण आणि उपासमारीमुळे अनेक मजुरांना वेळेवर जेवण मिळत नाही, त्यामुळे बिस्किटासारख्या साध्या गोष्टींवरच त्यांना दिवस काढावा लागतो.
तर आणखी एका व्यक्तीने प्रतिक्रिया देताना लिहिले की, ‘मजबुरी माणसाकडून काहीही करून घेते.’ काहींनी त्या मजुराच्या चेहऱ्यावरच्या हसऱ्या भावाकडे लक्ष वेधत, ‘खरा आनंद हा मनात असतो, परिस्थितीत नाही,’ असेही म्हटले.
व्हिडीओ पाहून अनेकांना स्वतःच्या आयुष्याची जाणीव
हा व्हिडीओ कितपत जुना आहे किंवा नेमका कुठला आहे याची अधिकृत माहिती समोर आलेली नाही. मात्र, सोशल मीडियावर तो मोठ्या प्रमाणात शेअर केला जात आहे. अनेकांसाठी हा फक्त काही सेकंदांचा व्हिडीओ असला, तरी तो कष्टकरी वर्गाचे वास्तव, गरिबीची झळ आणि जगण्यासाठी सुरू असलेला रोजचा संघर्ष डोळ्यांसमोर उभा करतो.
कधी कधी आयुष्यातील सर्वांत मोठ्या गोष्टी शब्दात सांगाव्या लागत नाहीत. पाण्यात बिस्किटे बुडवून शांतपणे भूक भागवणाऱ्या त्या मजुराचा हा व्हिडीओही अशीच एक निःशब्द कहाणी सांगतो, जी पाहिल्यानंतर अनेकांच्या मनात कृतज्ञतेची आणि संवेदनांची भावना जागी होत आहे.
