नवी मुंबई : केंद्र शासनाने महागाई लादल्याची टीका युवासेनेचे नेते वरुण सरदेसाई यांनी केली. याविरोधात राज्यव्यापी सायकल रॅली युवासेना काढणार आहे. नवी मुंबई शहरातील युवकांनी हे आंदोलन यशस्वी करण्याचे आवाहन त्यांनी केले. नवी मुंबईत शिवसेनेने सोमवारी दरवाढीविरोधात आंदोलनाची घोषणा केली आहे. इतर पक्षातील नेते शिवसेनेत येण्यास इच्छुक आहेत. यामध्ये नवी मुंबई शहरातील बड्या तरुण नेत्यांचा समावेश असल्याचा दावा सरदेसाई यांनी वाशी येथील मेळाव्यात केला. युवकांच्या आक्रमकतेची चुणूक बघितली आहे. १८ ते ३५ वयोगटातील तरुणांना शिवसेनेकडे खेचून आणू मात्र वरिष्ठांनी साथ द्यावी आमच्याकडे स्पर्धा म्हणून बघू नये. तर युवा पदाधिकारी नेमण्यासाठी ज्येष्ठ नेत्यांनी मदत करावी, अशी अपेक्षा व्यक्त केली. या वेळी उपनेते विजय नाहटा, खासदार राजन विचारे, माजी विरोधी पक्षनेते विजय चौगुले, जिल्हाप्रमुख विठ्ठल मोरे, द्वारकानाथ भोईर आदी उपस्थित होते.
