पावसात पाय घसरला; २२ व्या मजल्यावरून पडून कामगाराचा मृत्यू

अब्दुल (वय २०) असे मृत्यू झालेल्या कामगाराचे नाव आहे. तो भाईंदर पश्चिम येथील नव्याने उभारण्यात येत असलेल्या ‘स्कायलाईन’ या निर्माणाधीन इमारतीमध्ये आपल्या तीन भावांसोबत राहत होता. रविवारी रात्रीच्या सुमारास तो इमारतीच्या २२ व्या मजल्यावर पाण्याचा नळ सुरू करण्यासाठी गेला होता. त्यावेळी पाय घसरून तो थेट खाली पडल्याने त्याचा जागीच मृत्यू झाला.

या संदर्भात पोलिसांनी नोंद करून तपास सुरू केला आहे. प्राथमिक तपासात पाय घसरल्यामुळे तो वरून पडल्याचे समोर आले आहे. मृत कामगार मूळचा बिहारचा असून, अंत्यविधीसाठी त्याचा मृतदेह कुटुंबीयांनी बिहारला नेला आहे. या प्रकरणाचा अधिक तपास सुरू असल्याची माहिती पोलिसांनी दिली.

महिनाभरात दुसरी घटना

मीरा-भाईंदर शहरातील बांधकाम स्थळांवर सुरक्षेच्या दृष्टीने आवश्यक उपाययोजनांचा अभाव असल्यामुळे महिनाभरात दोन कामगारांचा संशयास्पद मृत्यू झाल्याचे समोर आले आहे. या दोन्ही प्रकरणांत संबंधित कामगार नेमक्या कोणत्या कामासाठी वर गेले होते, हे अद्याप स्पष्ट झालेले नाही. तसेच संबंधित बांधकाम व्यावसायिकांवर गुन्हा दाखल करण्याबाबत पोलिसांकडून टाळाटाळ केली जात असल्याचा आरोपही केला जात आहे.