नाताळाच्या ख्रिस्त आगमनाच्या काळाला सुरुवात, चर्चमध्ये जांभळ्या मेणबत्त्या प्रज्वलित; वसईत दोन वर्षांनंतर नाताळचा जल्लोष | christmas celebration after two years in vasai | Loksatta

नाताळाच्या ख्रिस्त आगमनाच्या काळाला सुरुवात, चर्चमध्ये जांभळ्या मेणबत्त्या प्रज्वलित; वसईत दोन वर्षांनंतर नाताळचा जल्लोष

२५ डिसेंबरला होणाऱ्या नाताळ सणाच्या आधी महिनाभर आधी आगमन काळ सुरू होतो.

नाताळाच्या ख्रिस्त आगमनाच्या काळाला सुरुवात, चर्चमध्ये जांभळ्या मेणबत्त्या प्रज्वलित; वसईत दोन वर्षांनंतर नाताळचा जल्लोष
रविवार, २७ नोव्हेंबरला वसईतील सर्व चर्चेसमध्ये पहिली जांभळय़ा रंगाची मेणबत्ती प्रज्वलित करण्यात आली.

वसई : करोनच्या निर्बंधांमुळे मागील दोन वर्षांपासून असलेल्या बंधनातून मुक्ती मिळाल्याने यंदा नाताळ मोठय़ा उत्साहात आणि जल्लोषात साजरा होणार आहे. नाताळाच्या ख्रिस्त आगमनाच्या काळाला सुरुवात झाली असून रविवार, २७ नोव्हेंबरला वसईतील सर्व चर्चेसमध्ये पहिली जांभळय़ा रंगाची मेणबत्ती प्रज्वलित करण्यात आली.

२५ डिसेंबरला होणाऱ्या नाताळ सणाच्या आधी महिनाभर आधी आगमन काळ सुरू होतो. त्यासाठी डिसेंबर महिन्याच्या पहिल्या आणि दुसऱ्या रविवारी जांभळी, तिसऱ्या रविवारी गुलाबी रंगाची मेणबत्ती प्रज्वलित करून येशू ख्रिस्ताच्या आगमनाचा संदेश ख्रिस्त मंदिरांतून दिला जातो. त्यानंतर २४ डिसेंबरच्या मध्यरात्री येशूजन्माच्या वेळी पांढऱ्या रंगाची मेणबत्ती प्रज्वलित करून ख्रिस्त जन्मोत्सव साजरा केला जातो. या आगमनकाळाला सुरुवात झाली आहे. रविवारी वसईच्या विविध चर्चेसमध्ये जांभळी मेणबत्ती पेटविण्यात आली. ख्रिस्ती श्रद्धेनुसार जांभळा रंग हा आशेचा रंग असून प्रभू येशू ख्रिस्त मानवाच्या कल्याणासाठी पृथ्वीवर येत आहे, ही आशा या मेणबत्तीच्या प्रज्वलनाने जागवली जात असते. येशूजन्माच्या सातशे वर्षे आधी यशया या संदेष्टय़ाने येशूच्या जन्माचे भाकीत करून तत्कालीन लोकांना पापमुक्ती आणि तारणाची आशा दिली होती. त्याचेही प्रतीक म्हणून जांभळय़ा रंगाची मेणबत्ती प्रज्वलित केली जाते.

यंदा नाताळ सण उत्साहात आणि निर्बंधमुक्त

करोनामुळे दोन वर्षांंपासून नाताळ सण मुक्तपणे साजरा करता आला नव्हता. यंदा मात्र कसलेही बंधन नसल्याने चर्चमध्ये सामूहिक मिस्सा (प्रार्थना) होणार आहेत. खऱ्या अर्थाने नाताळ आनंददायी वातावरणात साजरा होणार आहे. कॅरल सिंगिंग, कार्निवल आणि इतर धार्मिक कार्यRम यंदा वसईत साजरे केले जाणार आहे, अशी माहिती मॉन्सेनियअर फादर फ्रान्सिस कोरिया यांनी दिली.

मेरी ख्रिसमसच्या ऐवजी हॅप्पी ख्रिसमस का म्हणत नाहीत? स्वतः राणी एलिझाबेथने सांगितलं होतं ‘हे’ मोठं कारण

आगमन काळ आणि मेणबत्तीचे महत्त्व

कॅथोलिक चर्चचे उपासना वर्ष हे आगमन काळाच्या पहिल्या रविवारी सुरू होते. २५ डिसेंबरपूर्वी येणारे चार रविवार हे आगमन काळातील पहिला, दुसरा, तिसरा व चौथा रविवार अशा नावांनी ओळखले जातात. आगमन काळातील पहिल्या भागात ख्रिस्तसभा प्रभू येशूच्या पुनरागमनाची तयारी करण्यासाठी भाविकांना आवाहन करते. दुसऱ्या भागात १७ डिसेंबर ते २४ डिसेंबर या दरम्यान ख्रिस्तसभा येशूच्या पहिल्या येण्याची स्मृती साजरी म्हणजेच ख्रिसमसची तयारी करते. आगमन काळातील चार रविवारी वर्तुळाकार रिथवर प्रत्येक रविवारी एक या क्रमाने चार मेणबत्त्या प्रज्वलित करण्याची प्रथा आहे. त्या मेणबत्त्या अनुक्रमे विश्वास, आशा, पश्चात्ताप आणि आज्ञाधारकपणा यांच्या जीवनाची प्रतीके मानली जातात.

मराठीतील सर्व वसई विरार ( Vasaivirar ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 29-11-2022 at 15:00 IST
Next Story
विरार: माहेर गाठण्यासाठी दुचाकीवरून जर्मनी ते भाईंदर पतीसह १५६ दिवसांत; २४ हजार किमीचा पल्ला पार