Hitendra Thakur vs BJP: हितेंद्र ठाकूर की भाजप… कोण राखणार वसई विरारचा गड?

वसई विरार महापालिका निवडणुकीच्या पार्श्वभूमीवर शहरातील राजकीय वातावरण चांगलेच तापले आहे. बहुजन विकास आघाडी आणि भाजप या दोन्ही पक्षांनी महापालिकेवर आपली सत्ता स्थापन व्हावी यासाठी कंबर कसली आहे. २०१९ च्या विधानसभा निवडणुकीत वसई, नालासोपारा आणि बोईसर या तिन्ही जागा जिंकत बविआने आपले वर्चस्व सिद्ध केले होते. पण, २०२४ साली झालेल्या विधानसभा निवडणुकीत मात्र बहुजन विकास आघाडीची ताकद ओसरली.

हितेंद्र ठाकूर यांनी विधानसभेच्या तिन्ही जागा गमावल्यामुळे ३५ वर्षाच्या एक हाती सत्तेला ग्रहण लागले आहे. २०१५ च्या पालिका निवडणुकीत ११५ पैकी १०६ जागांवर हितेंद्र ठाकूरांनी विजय मिळवला होता. त्यामुळे आता ही जुनी सत्ता टिकवून ठेवण्याचे मोठे आव्हान त्याच्यासमोर उभे राहिले आहे.

तर विधानसभा निवडणुकीत विजय मिळवल्यानंतर भाजपही महापालिका निवडणुकीत साम दाम दंड भेद यांनी तिचा अवलंब करताना दिसत आहे. एकीकडे खुद्द मुख्यमंत्र्यांनी नालासोपारा येथे सभा घेत सुपरफास्ट विकासाचे आश्वासन दिले आहे. तर कॅबिनेट मंत्री, पाच आमदार, नवनिर्वाचित नगरसेवकांना प्रचाराच्या रिंगणात भाजपने उतरवले होते. याशिवाय मैथिली ठाकूर, सुरेश गोपी या स्टार प्रसारकांच्या माध्यमातून मतदारांना साथ घालण्यात आली. तर बहुजन विकास आघाडीच्या अनेक पदाधिकारी आणि नगरसेवकांनी ऐन निवडणुकीच्या काळात भाजपमध्ये प्रवेश केल्यामुळे बविआच्या संघटन शक्तीला सुरुंग लागला आहे

जरी विधानसभा निवडणुकीत बहुजन विकास आघाडीचा पराभव झाला असला तरी महापालिका क्षेत्रात त्यांची संघटन शक्ती आजही मजबूत आहे त्यामुळे माजी आमदार हितेंद्र ठाकूर आणि क्षितिज ठाकूर यांनी आपल्या निष्ठावान कार्यकर्त्यांच्या जोरावर खिंड लढवण्यास सुरुवात केली आहे. बहुजन विकास आघाडीने ५० माजी नगरसेवकांना मैदानात उतरवले असून त्यांची प्रतिष्ठाही यावेळी पणाला लागली आहे.

तर बहुजन विकास आघाडी सोडून भाजपमध्ये प्रवेश केलेल्या पदाधिकारी आणि कार्यकर्त्यांची ही निवडणूक अग्निपरीक्षा ठरणार आहे. तर भाजपसाठी ही निवडणूक म्हणजे सत्ता काबीज करण्याची ऐतिहासिक संधी आहे. त्यामुळे आजच्या मतदानानंतर वसई-विरार चा गड कोण राखणार याकडे सर्वांचे लक्ष लागले आहे.