अखेर मेढे-वडघर रस्ता पूर्ववत; नागरिकांना मोठा दिलासा

​वसई पूर्वेच्या मेढे-वडघर मार्गावरील हा साकव १८ जुलै रोजी अचानक खचून कोसळला होता. त्यावेळी पुलावरून जाणारी दोन वाहने खाली कोसळली; सुदैवाने या दुर्घटनेत कोणतीही जीवितहानी झाली नाही. मात्र, पूल कोसळल्यामुळे वडघर, कळंभोण, लेंडी यांसह अनेक गाव-पाड्यांचा मुख्य रस्त्याशी संपर्क तुटला होता.

​पर्यायी मार्ग अत्यंत लांबचा असल्याने त्याचा फटका शाळकरी विद्यार्थी, नोकरदार वर्ग, शेतकरी आणि ज्येष्ठ नागरिकांना बसला. अवघ्या ३ किलोमीटरच्या प्रवासासाठी नागरिकांना तब्बल २० ते ३० किलोमीटरचा मोठा वळसा घालावा लागत होता. तर दुसरीकडे, काही विद्यार्थी व नागरिक साचलेल्या पाण्यातून आणि चिखलातून जीव मुठीत धरून वाट काढत होते. महिलांनाही डोक्यावर ओझे घेऊन या दलदलीतून फरफटत रस्ता पार करावा लागत होता.

​नागरिकांची होणारी दैना पाहता, या पुलाची तातडीने दुरुस्ती करण्याची तीव्र मागणी जोर धरू लागली होती. हा पूल सुमारे ५० वर्षे जुना असून, वाढत्या अवजड वाहतुकीचा भार सहन न झाल्यानेच तो खचल्याचा आरोप स्थानिक नागरिकांनी केला होता.

​हा पूल जिल्हा परिषदेच्या अखत्यारीत येत असल्याने प्रशासनाने तातडीने पावले उचलत त्याठिकाणी काँक्रीटचे पाईप टाकले आणि त्यावर काँक्रीटीकरण करून रस्ता तयार केला. या कामात स्थानिक नागरिक आणि व्यावसायिकांनीही मोलाचे सहकार्य केले. अखेर ११ दिवसांच्या प्रतीक्षेनंतर हा रस्ता वाहतुकीसाठी पूर्ववत सुरू झाल्याने हजारो ग्रामस्थांना मोठा दिलासा मिळाला आहे.