भाईंदर: मिरा-भाईंदर महापालिकेच्या सर्वसाधारण महासभेला नगरसेवक वेळेवर उपस्थित राहत नसल्याचे वारंवार दिसून येत आहे. त्यामुळे सकाळी ११ वाजता नियोजित असलेल्या महासभेचे कामकाज अनेकदा अर्धा ते एक तास उशिराने सुरू होत आहे. लोकप्रतिनिधींच्या या उशिरामुळे सभागृहाचा महत्त्वाचा वेळ वाया जात असून, विषयपत्रिकेवरील सर्व विषयांवर चर्चा पूर्ण करण्यासाठी तहकूब सभा घेण्याची वेळ येत आहे.
मिरा-भाईंदर महापालिकेची दर महिन्याला सर्वसाधारण महासभा आयोजित केली जाते. पालिका मुख्यालयाच्या तिसऱ्या मजल्यावरील सभागृहात महापौर डिंपल मेहता यांच्या अध्यक्षतेखाली ही सभा होते. शहराशी संबंधित विविध धोरणे, विकासकामे, प्रस्ताव आणि महत्त्वाचे निर्णय या सभेत घेतले जातात. विषयपत्रिकेवरील विषयांवर नगरसेवकांकडून चर्चा करून त्यावर ठराव केले जात असल्याने महासभेच्या कामकाजाला विशेष महत्त्व आहे.
मात्र, असे असतानाही अनेक नगरसेवक सभेच्या निश्चित वेळेत उपस्थित राहत नसल्याचे चित्र आहे. सकाळी ११ वाजता सभा नियोजित असताना अनेक लोकप्रतिनिधी अर्धा तास किंवा त्याहून अधिक उशिराने सभागृहात दाखल होत असल्याचे दिसून येते. मंगळवारी देखील आयोजित सभेला नगरसेवक उशिरा आल्याचे दिसून आले. त्यामुळे सभेचे कामकाज वेळेत सुरू होत नाही. परिणामी विषयपत्रिकेवरील अनेक विषय प्रलंबित राहतात. विषयपत्रिकेवरील विषय पूर्ण करण्यासाठी काही वेळा दुसऱ्या दिवशी तहकूब सभा घ्यावी लागते. यामुळे प्रशासनातील अधिकारी-कर्मचाऱ्यांचा अतिरिक्त वेळ खर्ची पडतो. तसेच सभेच्या आयोजनासाठी होणारा खर्चही वाढतो. लोकप्रतिनिधींनी वेळेचे भान ठेवून सभेच्या निश्चित वेळेत उपस्थित राहणे गरजेचे असल्याची प्रतिक्रिया नागरिकांकडून व्यक्त होत आहे.
प्रशासकीय राजवट संपल्यानंतरही गांभीर्याचा अभाव
मिरा-भाईंदर महापालिकेत मागील सुमारे तीन वर्षे प्रशासकीय राजवट होती. जानेवारीमध्ये झालेल्या महापालिका निवडणुकीनंतर मार्चपासून लोकप्रतिनिधी पुन्हा प्रत्यक्ष कामकाजात सहभागी झाले आहेत. त्यामुळे महासभेच्या माध्यमातून शहरातील प्रश्नांवर चर्चा करून निर्णय घेण्याची मोठी जबाबदारी नगरसेवकांवर आहे. मात्र, महत्त्वाच्या सभेलाच वेळेवर उपस्थित न राहण्याच्या प्रकारामुळे लोकप्रतिनिधींच्या कामकाजाच्या गांभीर्यावर प्रश्न उपस्थित होत आहेत. नागरिकांच्या प्रश्नांवर चर्चा करून त्यावर निर्णय घेण्यासाठी मिळणारा प्रत्येक मिनिट महत्त्वाचा आहे. त्यामुळे नगरसेवकांनी महासभेच्या वेळेचे पालन करून वेळेत उपस्थित राहणे आवश्यक असल्याचे नागरिकांचे म्हणणे आहे.
