सहा वर्षात ‘पीएम स्वनिधी’ योजनेतून ४६ कोटींचे अर्थसहाय्य

पथविक्रेत्यांना आत्मनिर्भर करण्यासाठी पंतप्रधान स्वनिधी कर्जवाटप योजना सुरू करण्यात आली आहे. करोनाच्या संकटकाळात अनेकांच्या हातचे रोजगार निघून गेले होते. त्यानंतर छोट्या व्यावसायिकांना प्रोत्साहन मिळावे या उद्देशाने पंतप्रधान स्वनिधी योजनेंतर्गत नाममात्र व्याजदरावर सुरवातीला १० हजार रुपये इतके कर्ज उपलब्ध करून दिले होते. जे व्यावसायिक या कर्जाची परतफेड करतील त्यांना २० हजार , ५० हजार असे कर्ज उपलब्ध करून दिले जात आहे. हे कर्ज शहरातील राष्ट्रीयकृत बँका, मल्टिस्टेट बँका, को-ऑपरेटिव बँक अशा विविध बँका मधून कर्ज वितरण केले जात आहे. या योजनेची वसई विरार महापालिकेनेही अंमलबजावणी केली होती.

यात सहा वर्षात महापालिके मार्फत ३४ हजार ७५ इतक्या कर्ज प्रकरणांना मंजुरी दिली आहे. मंजूर कर्जाची रक्कम ही ५० कोटी २५ लाख इतकी आहे. तसेच, लाभार्थ्यांना ३१ हजार ९०६ कर्ज प्रकरणांद्वारे ४६ कोटी ४ लाखांचे कर्ज वितरित करण्यात आली असून, या योजनेमुळे शहरातील पथविक्रेते व लघु व्यावसायिकांना आर्थिक बळ मिळाले आहे असा दावा महापालिकेने केला आहे.