वसई : मीरा-भाईंदर, वसई-विरार पोलीस आयुक्तालयातील पोलीस भरती प्रक्रिया शुक्रवारपासून सुरू झाली. पहिल्याच दिवशी महिलांची मैदानी चाचणी घेण्यात आली. महिला पोलिसांच्या २९४ जागांसाठी ११ हजार ७८७ अर्ज आले असून महिला आणि पुरूषांच्या एकूण ९९६ जागांसाठी ७४ हजार ४५८ उमेदवारांचे अर्ज आले आहेत. २८ फेब्रुवारीपर्यंत ही मैदानी चाचणी होणार आहे. सध्या शिपाई पदाच्या ९८६ तर शिपाई वाहन चालक पदाच्या दहा अशा एकूण ९९६ पदांसाठी भरती सुरू आहे. पोलीस आयुक्त मधुकर पांडेय, अतिरिक्त पोलीस आयुक्त श्रीकांत पाठक यांच्या मार्गदर्शनाखाली शेकडो अधिकारी-अंमलदारांच्या बंदोबस्तात भरती प्रक्रिया सुरू आहे. महिलांच्या २९४ जागांसाठी ११ हजार ७८७ अर्ज आले आहेत. यामध्ये ३ महिलांसाठी चालक म्हणून जागा उपलब्ध आहे.
