इंधन पुरवठ्यावर नियंत्रण ठेवा; पुरवठा अधिकाऱ्याच्या पंप चालकांना सूचना

इराण व इस्रायल आणि अमेरिका यांच्यात सुरू असलेल्या युद्धामुळे जगभरातील इंधन पुरवठ्यावर परिणाम झाला आहे. जागतिक बाजारात इंधनाच्या किंमती वाढल्या असून त्याचा परिणाम महाराष्ट्रातील इंधनाच्या किंमतींवरही होताना दिसत आहे. सध्याच्या घडीला पेट्रोलचा दर १०४ रुपये प्रति लिटर आहे. तर डिझेलचा दर ९० रुपये प्रति लिटरवर पोहोचला आहे.

मध्यंतरी इंधन टंचाईच्या अफवा पसरल्यामुळे राज्यातील इतर भागांप्रमाणे वसई विरार शहरातील पेट्रोल पंपांबाहेरसुद्धा पेट्रोल आणि डिझेलसाठी लांबच लांब रांगा लागल्या होत्या. त्यामुळे शहरातील इंधन पुरवठा सुरळीत रहावा यासाठी बुधवारी वसई तहसील कार्यालयात तहसीलदार दिपक गायकवाड, पुरवठा अधिकारी भागवत सोनार यांच्या अध्यक्षतेखाली पेट्रोल पंप आणि डिझेल पंप चालकांची बैठक घेण्यात आली. यात शहरातील ४० ते ४५ पंप चालक सहभागी झाले होते.

यावेळी इंधन पुरवठा करताना तो नियंत्रित पद्धतीनेच करण्यात यावा. तसेच एखादा ग्राहक नेहमीपेक्षा जास्तीच्या इंधनाची मागणी करत असल्यास पुरवठा करू नये. तसेच इंधनाची काळाबाजारी न करण्याच्या सूचनाही यावेळी पुरवठा अधिकारी भागवत सोनार यांनी बैठकीत पंप चालकांना दिली. तसेच इंधनाची काळाबाजारी रोखण्यासाठी विशेष पथकाची नेमणूक करण्यात आली असून दोषी पंप चालकांवर कारवाई करण्यात येईल, अशी माहितीही त्यांनी दिली आहे.