अनधिकृत बांधकामे अन् फेरीवाल्यांवर कारवाईसाठी वसईत मनसेचे आमरण उपोषण

प्रभाग समिती एचच्या अंतर्गत वसई पश्चिमेतील माणिकपूर – नवघर परिसर येतो. या परिसरात सार्वजनिक रस्ते, गटारे आणि फूटपाथवर २०२१ पासून अनधिकृत अतिक्रमणे व फेरीवाल्यांचे प्रमाण वाढले असल्याची तक्रार मनसेकडून करण्यात आली होती. तसेच या हातगाड्या व दुकानांना पालिकेकडून कोणतीही अधिकृत परवानगी देण्यात आली नसल्याचे पालिकेकडून स्पष्ट करण्यात आले आहे.

मात्र, असे असताना देखील अंबाडी रोड, नवघर माणिकपूर परिसरातील अवैध फेरीवाले, अनधिकृत दुकाने आणि पत्र्याच्या शेडवर कोणतीही कारवाई करण्यात आली नसल्याने सोमवार, ३ ऑगस्टपासून एच प्रभाग समितीच्या कार्यालयासमोर मनसे पदाधिकारी आणि कार्यकर्त्यांनी आमरण उपोषण पुकारले आहे.

प्रभाग समिती एचमधील सर्व अनधिकृत हातगाड्या, पत्र्याचे स्टॉल, फेरीवाले व अतिक्रमणांचे पंचनामे करून कायदेशीर कारवाई करण्यात यावी, रस्ते, गटारे, नाले व पालिकेच्या सार्वजनिक जागांवरील अतिक्रमणे तात्काळ हटवावीत आणि सामान्य नागरिकांच्या तक्रारीकडे दुर्लक्ष करणारे सहाय्यक आयुक्त अतिक्रमण विभागातले अधिकारी यांच्यावरती कठोर कारवाई करावी अशी मागणी ही आंदोलनकर्त्यांनी केली आहे.