वसईत वाहतूक पोलीस आणि रिक्षाचालकामध्ये वाद ; व्हिडीओ सोशल मीडियावर व्हायरल

माझ्याकडे सर्व प्रकारची कागदपत्रे आहेत. तरी सुद्धा माझ्यावर का कारवाई केली जाते असा जाब रिक्षाचालकाने पोलिसांना विचारला, माझ्यावर कारवाई करायची असेल तर कायदेशीर मार्गाने ऑनलाईन दंड करा अशी मागणी तो वारंवार करताना व्हिडिओत ऐकू येत आहे. मात्र वाहतुक पोलिसाने रिक्षा जप्त करून गोदामात जमा केली जाईल असे सांगण्यात आले आहे.

​वसई-विरारमध्ये अशा प्रकारचे व्हिडिओ वारंवार समोर येत असल्याने पोलीस प्रशासनाच्या कार्यपद्धतीवर प्रश्नचिन्ह निर्माण झाले आहे. या घटनेमागील नेमकं सत्य काय आहे? वादाची सुरुवात नक्की कशामुळे झाली? आणि रिक्षाचालकाने केलेले लाचेचे आरोप किती सत्य आहेत? याबाबत सखोल चौकशी करण्याची मागणी नागरिकांमधून करण्यात येत आहे.

पोलिसावर भ्रष्टाचाराचे आरोप

रिक्षा चालक आणि वाहतूक पोलीस यांच्यात वाद सुरू असतानाच रिक्षाचालकाने पोलीसावर भ्रष्टाचाराचे आरोप केले आहे. पोलिसाने आपल्याकडून २०० रुपये घेतल्याचा दावा या चालकाने केला आहे. याबाबत नागरिकांमध्ये आणि सोशल मीडियावर संतापाची लाट उसळली आहे. ऑनलाईन दंडाची पावती फाडण्याऐवजी रोख रकमेची मागणी का केली गेली? असा प्रश्न आता नागरिक विचारत आहेत.

नालासोपाऱ्यात रिक्षाचालकाला मारहाण

मागील काही दिवसांपूर्वी नालासोपाऱ्यात एका रिक्षा चालकाने चार प्रवासी बसविले. त्यामुळे वाहतूक पोलिसांनी त्याला दंड आकारला होता. या दंडाबाबत विचारणा करण्यासाठी ते पुन्हा संबंधित वाहतूक पोलिसांकडे गेले असता वाद झाला. दंडाची माहिती व पुरावा मागितल्यावर समाधानकारक उत्तर न मिळाल्याने मिश्रा यांनी मोबाईलवर व्हिडिओ शूट करण्यास सुरुवात केली. याच रागातून एका वाहतूक पोलिसाने रिक्षाचालकाला मारहाण केली होती. त्याचा व्हिडीओ ही सोशल मीडियावर व्हायरल झाला होता.