छताचे जुने पत्रे बदलताना २५ फुटांवरून पडून कामगाराचा मृत्यू; ठेकेदारावर मांडवी पोलीस ठाण्यात गुन्हा दाखल

​मिळालेल्या माहितीनुसार, वैतरणा रोडवरील अमूल डेअरीच्या बाजूला असलेल्या ‘श्री प्रिती मेटल एसीई प्रायव्हेट लिमिटेड’ या कंपनीच्या छताचे जुने सिमेंटचे पत्रे काढून नवीन पत्रे बसवण्याचे आणि स्टील वेल्डिंगचे कंत्राट प्रेम बसंत यादव याने घेतले होते. बुधवारी सकाळी १० च्या सुमारास दोन ते तीन कामगार त्याठिकाणी छतावर पत्रे बसविण्याचे काम करीत होते. याच दरम्यान कामगार सुभाष हा २५ फुटावरून खाली कोसळला. यात कामगाराच्या डोक्याला गंभीर दुखापत झाली. तेथील नागरिकांनी त्याला उपचारासाठी त्याला तातडीने विरार पूर्वेतील जीवदानी हॉस्पिटल येथे दाखल केले असता उपचारादरम्यान त्याचा मृत्यू झाला.

ठेकेदाराने कामगारांच्या सुरक्षेच्या दृष्टीने सेफ्टी बेल्ट, हेल्मेट व अन्य कोणतीही साधने दिली नव्हती. या निष्काळजी पणामुळे या कामगाराला आपला जीव गमवावा लागला आहे. या प्रकरणी मांडवी पोलीस ठाण्यात ठेकेदार प्रेम यादव याच्या विरुद्ध गुन्हा दाखल केला असून याचा तपास सुरू असल्याचे वरिष्ठ पोलीस निरीक्षक रणजीत आंधळे यांनी सांगितले आहे.यापूर्वी सुद्धा वसई विरार भागात इमारती वरून पडून कामगारांचा मृत्यू झाल्याच्या घटना घडल्या आहेत.