Vasai Virar Municipal Corporation Election: निवडणुकीच्या प्रचारामुळे रिक्षाचालकांना ‘अच्छे दिन’; सात दिवसात पंधरा हजारांची कमाई

भाजप, बहुजन विकास आघाडी, शिवसेना (शिंदे गट), शिवसेना (ठाकरे गट), मनसे, राष्ट्रवादी काँग्रेस (अजित पवार) एमआयएम, वंचित बहुजन आघाडी, बहुजन समाज पार्टी या मुख्य पक्षांसह तब्बल १६७ अपक्ष उमेदवार वसई विरार महापालिका निवडणुकीच्या रिंगणात उतरले आहे. तर वसई विरार महापालिका निवडणुकीसाठी १५ जानेवारी रोजी मतदान पार पडणार आहे. तर आपला उमेदवार जास्तीत जास्त लोकांपर्यंत पोहोचावा आणि त्याला जास्तीत जास्त मतं मिळावीत यासाठी राजकीय पक्षांकडून जोरदार प्रचार सुरू झाला आहे.

पण, प्रचार करणाऱ्या प्रत्येक उमेदवाराला शहराचा कानाकोपरा माहिती असेलच असे नाही किंवा मोठ्या संख्येने कार्यकर्ते आणि चारचाकी वाहन एखाद्या गल्लीबोळात घेऊन जाणे शक्य होईल असे नसते. त्यामुळे आता राजकीय पक्षांकडून प्रचार करण्यासाठी रिक्षांना वापर केला जात आहे. सद्यस्थितीत शहरात कमीत कमी २०० ते २५० इतक्या रिक्षा प्रचारासाठी वापरल्या जात असल्याचे दिसून येत आहे.

राजकीय पक्षांचे लहान मोठे फलक, उमेदवाराचे छायाचित्र असणारा फलक, राजकीय पक्षांचे झेंडे आणि पक्षांशी संबंधित विविध घोषणा आणि प्रचारगीते मोठ्या आवाजात वाजवत गल्लीबोळातून फिरणारी रिक्षा आता लोकांचे लक्ष वेधून घेऊ लागले आहे. रिक्षा चालकांना कुठून प्रचार सुरू करायचा आणि कुठे थांबायचं हे सांगितले जाते. तसेच उमेदवाराचा एखादा कार्यकर्ता त्या रिक्षावाल्यासोबत प्रचारासाठी रिक्षातून फिरतो. उमेदवारांकडून या रिक्षाचालकांना ८०० ते १२०० इतके भाडे दिले जात आहे. त्यामुळे सात दिवसांच्या कालावधीत दहा ते पंधरा हजार रुपये कमावण्याची संधी मिळत असल्यामुळे प्रचाराचा काळ रिक्षाचालकांसाठी दिवाळीपेक्षा कमी ठरलेला नाही.

रिक्षा चिन्हावर २१ जण लढवणार निवडणूक वसई विरार महापालिका निवडणुकीत १६७ अपक्ष उमेदवार म्हणून निवडणूक लढवत आहे. या उमेदवारांना निवडणूक आयोगाकडून विविध चिन्ह देण्यात आली आहे. त्यापैकी एकूण २१ अपक्ष उमेदवारांना रिक्षा हे निवडणूक चिन्ह मिळालेले आहे.