वसई: वसई-विरार शहरात मुसळधार पावसामुळे वीजेचा लपंडाव सुरू असतानाच आता इंटरनेट सेवाही कोलमडली आहे. मोबाईलला पुरेशी रेंज नसल्याने आणि अनेक भागांतील इंटरनेट सेवा पूर्णपणे ठप्प झाल्याने नोकरदार (चाकरमानी) तसेच विद्यार्थ्यांच्या अडचणीत मोठी भर पडली आहे.
वसई-विरार परिसरात गेल्या पाच दिवसांपासून मुसळधार पाऊस कोसळत आहे. यामुळे मुख्य रस्त्यांवर पाणी साचणे, सखल भाग जलमय होणे आणि काही ठिकाणी नागरिकांच्या घरात पाणी शिरल्याने जनजीवन पूर्णपणे विस्कळीत झाले आहे. पूरसदृश परिस्थितीच्या या नेहमीच्या संकटात आता खंडित वीजपुरवठा आणि ठप्प झालेल्या इंटरनेट सुविधेची भर पडली आहे.
गेल्या २४ तासांत शहरात सुटलेला सोसाट्याचा वारा, वीज आणि इंटरनेटच्या तारांवर पडलेल्या झाडांच्या फांद्या, आणि वीजपुरवठा खंडित असणे यामुळे इंटरनेट यंत्रणा पूर्णपणे कोलमडली आहे. अनेक रहिवासी भागांत मोबाईल नेटवर्क (रेंज) नसल्याने नागरिकांचा एकमेकांशी संपर्क करणेही कठीण झाले आहे.
विद्यार्थी आणि नोकरदारांना फटका इंटरनेट सेवा पूर्ववत न झाल्याचा सर्वाधिक फटका ‘वर्क फ्रॉम होम’ करणाऱ्या आयटी आणि इतर क्षेत्रांतील नोकरदारांना बसला आहे. तसेच, आगामी परीक्षांची तयारी करणारे आणि ऑनलाईन शिक्षण घेणारे विद्यार्थी यामुळे हवालदिल झाले असून, त्यांच्या शैक्षणिक कामात मोठा अडथळा निर्माण झाला आहे. पावसासोबतच तांत्रिक सुविधांचा बोजवारा उडाल्याने नागरिकांमधून तीव्र संताप व्यक्त होत आहे.
