Virar Viral Video: “मेरा धर्म तो भ्रष्ट हुआ ना” चायनिज भेळमध्ये चिकन आढळल्यामुळे विरारमध्ये ग्राहक आणि हॉटेल चालकात वाद

तर विरारमधील असाच एक व्हिडिओ सध्या सोशल मीडियावर व्हायरल होत आहे. चायनिज खाद्य पदार्थ विक्री करणाऱ्या एका हॉटेलमध्ये शाकाहारी खवय्यांना चायनिज भेळमध्ये चिकनचे तुकडे आढळल्याने वाद निर्माण झाल्याचा व्हिडिओ सध्या तुफान व्हायरल होत आहे.

नेमकी घटना काय?

विरार पश्चिमेतील डी मार्ट रोड परिसरात चायनिज पदार्थांची विक्री करणारे हॉटेल आहे. शहरातील मुख्य आणि वर्दळीच्या परिसरात हे हॉटेल असल्यामुळे विरार तसेच आसपासच्या परिसरातील खवय्ये या ठिकाणी चायनिज पदार्थांचा आस्वाद घेण्यासाठी नेहमीच गर्दी करतात. दोन दिवसांपूर्वी तीन तरुण या हॉटेलमध्ये गेले होते. त्यांनी तिथे शाकाहारी चायनिज भेळेची ऑर्डर दिली. पण, ती खात असताना त्यांच्या लक्षात आले की यात चिकनचे काही तुकडे आहेत. शाकाहारी चायनिज भेळेची ऑर्डर देऊनही त्यात चिकनचे तुकडे आढळ्यामुळे ग्राहक आणि दुकानचालक दोघांमध्ये वाद निर्माण झाल्याचा व्हिडिओ सध्या व्हायरल होत आहे.

यावेळी तीन तरुणांपैकी एका तरुणाने घडल्या प्रकारचे चित्रण करत, “तुम्ही शाकाहारी आणि मांसाहारी पदार्थ एकत्र एकाच भांड्यात कसे काय शिजवू शकता? मी गुजराती जैन आहे आणि तुमच्यामुळे माझा धर्म भ्रष्ट झाला आहे”, हॉटेलचालकाला जाबही विचारला आहे.

तर, तुम्ही नेहमीच इथे येता मला माहीत आहे. आम्ही जाणूनबुजून नाही केलेलं तर चुकून झालं आहे. आम्हाला तुम्हाला मांसाहारी अन्न द्यायचं नव्हतं, असे उत्तर हॉटेलचालक देताना दिसत आहे.

नेटकऱ्यांकडून तरुणांवरच टीका

विरारमधील या व्हायरल व्हिडिओमधली तरुण चूक हॉटेलचालकाची असल्याची जरी सांगत असले तरी नेटकऱ्याकडून मात्र या तीन तरुणावरच टीका केली जात आहे. “तुम्ही शाकाहारी असाल तर शाकाहारी हॉटेलमध्ये जायचे ना”, अशी प्रतिक्रिया एका नेटकऱ्याने दिली आहे. तर “शाकाहारी आणि मांसाहारी असे दोन्ही पदार्थ विकणाऱ्या हॉटेलांवर विश्वासच ठेऊ नये”, अशी कमेंट दुसऱ्या एका नेटकऱ्याने केली आहे.