विरारमध्ये कोपरी गावात तब्बल १२ तास वीजपुरवठा खंडित

वसई विरार शहरात महावितरण कडून वीज पुरवठा केला जातो. वाढत्या उकाड्यामुळे विजेचा वापर ही वाढला आहे. या वाढत्या वीज वापरामुळे वितरण व्यवस्थेतवर ताण येऊन विद्युत पुरवठा खंडित होण्याच्या घटना वाढू लागल्या आहेत. विरार पूर्वेच्या कोपरी गावात सोमवारी रात्रीच्या सुमारास विद्युत वाहिन्यांमध्ये तांत्रिक बिघाड झाल्याने विज पुरवठा खंडित झाला होता.

तब्बल १२ तास उलटून गेले तरी अद्यापही येथील विद्युत पुरवठा पूर्ववत करण्यात महावितरणला यश आले नाही. आधीच उन्हाचा पारा वाढलेला असताना, रात्रभर पंखे आणि एसी बंद असल्याने लहान मुले, ज्येष्ठ नागरिक आणि घरात असलेल्या रुग्णांचे प्रचंड हाल झाले. अनेकांना उकाड्यामुळे रात्र जागून काढावी लागली.

​या गंभीर समस्येबाबत कोपरी गावातील नागरिकांनी महावितरणच्या नियंत्रण कक्षाशी वारंवार संपर्क साधून तक्रारी केल्या. मात्र, महावितरण प्रशासनाकडून याची तत्काळ दखल घेतली गेली नसल्याचा आरोप नागरिकांनी केला आहे. प्रशासनाच्या या उदासीनतेमुळे नागरिकांनी तीव्र संताप व्यक्त केला आहे. याबाबत महावितरण अधिकाऱ्यांशी संपर्क केला असता कोणताही प्रतिसाद मिळाला नाही.