30 May 2020

News Flash

फॅशन पॅशन : मेकओव्हर

माझं वय ४४ आहे आणि वजन ५० किलो. मी नेहमी पंजाबी सूट आणि चुणीदारच वापरत आले आहे. पण मला थोडय़ा वेगळ्या पद्धतीचे ड्रेस सजेस्ट करा.

| March 28, 2014 01:11 am

माझं वय ४४ आहे आणि वजन ५० किलो. मी नेहमी पंजाबी सूट आणि चुणीदारच वापरत आले आहे. पण मला थोडय़ा वेगळ्या पद्धतीचे ड्रेस सजेस्ट करा. किंवा वेगळे नेक पॅटर्नस् सुचवा. वेस्टर्न आऊटफिट्स काही सजेस्ट करू शकाल का?
– रोशनी

प्रिय रोशनी,
तुमच्या वर्णनावरून तुम्ही मध्यम बांध्याच्या वाटता. पण एक गोष्ट सुरुवातीलाच सांगितली पाहिजे. तुम्ही आत्तापर्यंत नेहमी सलवार कमीझ किंवा चुणीदार घालत आला आहात. मी एकदम काही वेस्टर्न आऊटफिट्स सुचवले तर तुम्हाला त्यात कंफर्टेबल वाटेलच असं नाही. एक गोष्ट नेहमी लक्षात ठेवा. तुमचं स्टाईल स्टेटमेंट बदलणं हे खूप धीराचं काम आहे. मनोमन त्यासाठी बरीच तयारी करावी लागते. कारण नेहमी लोकांना तुमच्याकडे एका ठरावीक पेहरावात बघण्याची सवय असते. एकदम त्यात बदल झाला तर तुमचे तुम्हाला व पाहणाऱ्या इतरांनाही कदाचित ते विचित्र वाटू शकते.
या परिस्थितीत बदल करायचे तर ते नेहमी सावकाश, लक्षात येतील न येतील असे करायला हवेत.
उदाहरणार्थ सुरुवातीला तुम्ही सलवारऐवजी धोती पँट्स किंवा चुणीदारऐवजी लेगिंग्ज अथवा जेगिंग्ज वापरून बघा. कुडत्याची लांबी, बाह्य़ांची स्टाइल बदलून बघा. थोडे दिवस हे छोटे बदल करत राहा आणि मग नेक पॅटर्न बदला. तुम्हाला आवडत असतील तर खोल गळ्याचे ड्रेस घाला आणि इन-कट ड्रेसही वापरून पाहा. आता ही स्टाइल काही दिवस करत राहा. त्याची डोळ्यांना सवय झाली की मग जीन्स आणि कुडता घालायला लागा. मग कुडत्याची लांबी कमी करा आणि जीन्सवर शॉर्ट कुर्ता घाला. जीन्सची लांबी कमी करून केप्री घालून बघायलाही हरकत नाही. मग शॉर्ट कुर्त्यांऐवजी टी-शर्ट घाला.
अशा प्रकारे तुमची स्टाइल पायऱ्या पायऱ्यांनी बदला. यामुळे तुमचा आत्मविश्वासही वाढेल आणि स्टाइलची फजिती होणार नाही. सगळ्यात महत्त्वाचं म्हणजे – तुम्ही स्टाइल बदलत असाल तेव्हा सध्या कुठली फॅशन चलतीत आहे, कसला ट्रेंड आहे, याचा विचार करा, शोध घ्या आणि त्याप्रमाणे बदल करा. उदाहरणार्थ सध्या लेसचं कापड प्रचलित आहे. तुमच्या कुर्त्यांसाठी लेसचं कापड वापरायला हरकत नाही. आणि या सगळ्या स्टाइल चेंजमध्ये तुमचे नेहमीचे सलवार- कुडता- चुणीदार वापरणं अगदी बंद करू नका. ते कधीच आऊट ऑफ फॅशन होत नाही.
तुमचे प्रश्न पाठवा
तुमच्या फॅशनविषयीच्या शंका आमच्याकडे पाठवा. फॅशन स्टायलिस्ट मृण्मयी मंगेशकर त्यांना या सदरातून उत्तर देतील.
सब्जेक्टलाईनमध्ये फॅशन पॅशन लिहायला विसरू नका. आमचा आयडी- viva.loksatta@gmail.com

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on March 28, 2014 1:11 am

Web Title: makeover
टॅग Girls,Ladies,Makeover
Next Stories
1 ‘साइज झीरोमुळे आयुष्याला वळण’
2 परीक्षेसाठी डाएट
3 ओपन अप : प्रेयसी आणि बायको
Just Now!
X