News Flash

संपाच्या हाकेचा ‘बेस्ट’ला धाक

‘भारत बंद’ किंवा ‘मुंबई बंद’ अशी हाक एखाद्या राजकीय पक्षाने दिली की, सर्वात पहिले ‘बेस्ट’ उपक्रमाला धडकी भरते.

| November 15, 2013 06:44 am

‘भारत बंद’ किंवा ‘मुंबई बंद’ अशी हाक एखाद्या राजकीय पक्षाने दिली की, सर्वात पहिले ‘बेस्ट’ उपक्रमाला धडकी भरते. कारण संप, बंद किंवा आंदोलन कोणत्याही पक्षाचे असले, तरी काचा मात्र बेस्ट बसच्याच फुटतात. एप्रिल २०१२ ते मार्च २०१३ या एका आर्थिक वर्षांत राजकीय पक्षांच्या संप व आंदोलनांमध्ये ‘बेस्ट’च्या तब्बल २३७ गाडय़ांची नासधूस झाली आहे. तर समाजकंटकांनी वेळोवेळी केलेल्या दगडफेकीत ‘बेस्ट’च्या ७५ बसेसच्या काचा फुटल्या आहेत. आधीच तोटय़ात असलेल्या बेस्ट उपक्रमाला या ३१२ गाडय़ांच्या दुरुस्तीपोटी तब्बल १० लाखांचा फटका बसला आहे. बंद, संप आणि आंदोलने यांमध्ये सार्वजनिक मालमत्तेचे नुकसान झाल्यास, त्याची जबाबदारी संबंधित राजकीय पक्षांवर असते. मात्र गेल्या वर्षभरात ‘बेस्ट’च्या २३७ बसेस फोडणाऱ्या राजकीय पक्षांनी किंवा संघटनांनी नुकसानभरपाईपोटी ‘बेस्ट’च्या तिजोरीत एक छदामही भरलेला नाही. या आंदोलनांपोटी बेस्टला तब्बल ७ लाख ६० हजार रुपये एवढे प्रचंड नुकसान झाले आहे.
अनेकदा मुंबईत काही अज्ञात व्यक्ती रागाच्या भरात ‘बेस्ट’च्या बसगाडय़ांवर दगडफेक करतात. या दगडफेकीत ‘बेस्ट’चे नुकसान खालीलप्रमाणे.
महिना              बसगाडय़ा    नुकसान (रु.)
एप्रिल २०१२    ०४      ६,०३६
मे २०१२    २८    ४१,२१६
जून २०१२    ०५    ४,७४४
जुलै २०१२    ०३    २,३४८
ऑगस्ट १२    ०९      २९,९७२
ऑक्टो २०१२    ०२       ८,८४२
नोव्हें. २०१२    ०८      २९,५२५
डिसें. २०१२    ०३       ९,०४५
जाने. २०१३    ०३       ७,०१६
फेब्रु. २०१३    ०४    १०,८८४
मार्च २०१३    ०६    २४,१२०
एकूण     ७५    १,७३,७४८
* तारीख : १९ मे २०१२.
     घटनास्थळ : जांबोरी मैदान ,वरळी नाका
एका सोशल नेटवर्किंग साइटवर गौतम बुद्धांच्या प्रतिमेचा अवमान केल्याच्या कारणास्तव रिपब्लिकन पार्टी ऑफ इंडियाच्या कार्यकर्त्यांनी वरळी नाका आणि जांबोरी मैदान येथे ‘बेस्ट’च्या गाडय़ांवर दगडफेक केली. पोलिसांनी ताबडतोब हस्तक्षेप करत या कार्यकर्त्यांना अटक केली. ‘बेस्ट’च्या गाडय़ांचे फार नुकसान झाले नाही.
फुटलेल्या बसेस : ५ (काचा). नुकसान : ९,३३३ रुपये

* तारीख : ३१ मे २०१२.
     घटनास्थळ : संपूर्ण मुंबई
याच महिन्यात झालेल्या इंधन दरवाढीमुळे आक्रमक बनलेल्या विरोधी पक्षांनी ‘भारत बंद’ची हाक दिली. मुंबईत भाजप आणि शिवसेना यांनी एकत्रितपणे पुकारलेल्या या ‘भारत बंद’चा मोठा फटका ‘बेस्ट’ला बसला. संपूर्ण मुंबईभर झालेल्या दगडफेकीच्या विविध घटनांमध्ये ‘बेस्ट’च्या बसेसना लक्ष्य करण्यात आले.
फुटलेल्या बसेस : १५६. नुकसान : २,९७,४९९ रुपये.

* तारीख : ११ ऑगस्ट २०१२.
      घटनास्थळ : छत्रपती शिवाजी टर्मिनस
आसाममध्ये बोडो आंदोलकांनी अल्पसंख्याकांच्या विरोधात केलेल्या आंदोलनाचा निषेध म्हणून रझा अकादमी या संघटनेने मुंबईच्या आझाद मैदानावर रॅली आयोजित केली होती. या रॅलीत सहभागी झालेल्या अल्पसंख्याक तरुणांनी आक्रमक होत पोलिसांना मारहाण केली. प्रसारमाध्यमांच्या गाडय़ा जाळल्या आणि या गदारोळात ‘बेस्ट’च्या काही बसेसही पेटवल्या. या रॅलीनंतर राजकारण भलतेच तापले होते. मात्र ‘बेस्ट’ला कोणतीही नुकसानभरपाई मिळाली नाही.
फुटलेल्या बसेस : ५०. नुकसान : ४,०५,९६४ रुपये.

* तारीख : १५, १७ आणि १८ नोव्हेंबर २०१२.
    घटनास्थळ : मुंबईतील काही उपनगरे
शिवसेनाप्रमुख बाळासाहेब ठाकरे यांच्या निधनाची अफवा १५ नोव्हेंबर रोजी पसरली आणि मुंबई धडाधड बंद झाली. या अफवेमुळे निर्माण झालेल्या तणावपूर्ण परिस्थितीचा फटका ‘बेस्ट’ला बसला. १७ नोव्हेंबर रोजी बाळासाहेब ठाकरे यांचे निधन झाले आणि लोकांना शोक अनावर झाला. या दिवशी आणि दुसऱ्याही दिवशी मुंबईच्या काही उपनगरांमध्ये ‘बेस्ट’ बसना लक्ष्य करण्यात आले होते.
फुटलेल्या बसेस : २३. नुकसान : ४२,५०१ रुपये.

* तारीख : २० फेब्रुवारी २०१३.
     घटनास्थळ : मुंबईतील उपनगरे
विविध कामगार संघटनांनी दिलेल्या दोन दिवसीय भारत बंदच्या हाकेला मुंबईत फारसा प्रतिसाद मिळाला नाही. कामगार संघटनांचे नेते शरद राव यांच्या अनेक संघटनांनी या बंदमधून माघार घेतल्याने मुंबईला या बंदचा फटका बसला नाही. पण ‘बेस्ट’ला मात्र जाता जाता या बंदने आपला तडाखा दाखवला. मुंबईत काही बसगाडय़ांवर दगडफेक झाली.
फुटलेल्या बसेस : ३. नुकसान : ४,३५३ रुपये

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on November 15, 2013 6:44 am

Web Title: 10 lakhs loss and 312 buses scrapped in stone pelting
Next Stories
1 जाऊ पुस्तकांच्या गावा
2 ‘टाटा लिटरेचर फेस्ट’ला मुंबईत सुरुवात
3 ‘घर’खरेदीला अजूनही कुलुपच!
Just Now!
X