पोलीस वसाहतीत येऊन महिलांबरोबर बोलतो, याचा राग मनात धरून एका वकीलपुत्राला डांबून बेदम मारहाण केल्याप्रकरणी पोलिसाच्या मुलासह तिघा जणांविरुद्ध फौजदार चावडी पोलीस ठाण्यात गुन्हा दाखल झाला आहे. मुरारजी पेठेतील पोलीस कल्याण केंद्राजवळ हा प्रकार घडला.आल्हाद अरविंद अंदोरे (वय २०, रा. अभिमानश्रीनगर, सोलापूर) असे जखमी तरुणाचे नाव आहे. त्याने दिलेल्या फिर्यादीनुसार स्वप्नील भाऊ शिंदे या पोलीसपुत्रासह नागेश खरात व महेश यमगर यांच्याविरुद्ध गुन्हा दाखल झाला आहे. स्वप्नील शिंदे याने आल्हाद यास नरसिंग गिरजी गिरणी चाळीत कामानिमित्त बोलावून घेतले. नंतर त्यास पोलीस कल्याण केंद्राजवळ आणून एका खोलीत डांबून ठेवले. आमच्या वसाहतीत येऊन महिलांबरोबर बोलतोस काय, लफडे करतोस काय, असे विचारून या तिघा जणांनी त्यास बेदम मारहाण केली. पोलिसांनी या तिघा जणांना अटक केली आहे.
