राष्ट्रवादी कॉग्रेस पक्षाचे शहर अध्यक्ष दीपक जयस्वाल यांना मंगळवारी चंद्रपूर व गडचिरोली जिल्ह्य़ातून तडीपार करण्याची नोटीस उपविभागीय पोलीस अधिकारी डॉ.राजू भुजबळ यांनी बजावल्याने राजकीय वर्तुळात खळबळ उडाली आहे. येथील मद्य व्यावसायिक दीपक जयस्वाल यांच्यावर रामनगर पोलीस ठाण्यात चार, तर गोंडपिंपरी पोलीस ठाण्यात मद्य तस्करीचा एक गुन्हा दाखल आहे. त्यांना या प्रकरणात गोंडपिंपरीचे ठाणेदार प्रवीण परदेशी यांनी अटकही केली होती. जानेवारी २०१३ मधील हे प्रकरण राजकीय वर्तुळात गाजले होते. याच प्रकरणामुळे जयस्वाल यांना राष्ट्रवादीचे शहर अध्यक्षपदावरून दूर करण्यात आले होते. १० सप्टेंबर १९९९ ते आजपर्यंत जयस्वाल यांच्यावर पाच गुन्हे दाखल आहेत. हे गुन्हे गंभीर स्वरूपाचे असल्याने उपविभागीय पोलीस अधिकारी डॉ.भुजबळ यांनी त्यांना नोटीस बजावली आहे. ४ फेब्रुवारीला ही नोटीस बजावण्यात आली आहे. उपविभागीय अधिकाऱ्याच्या या नोटीसमुळे राजकीय वर्तुळात खळबळ उडाली आहे.
