News Flash

वाद्यांच्या गजरात साता-यात गणरायाला निरोप

सातारा शहरात गणपती विसर्जनाच्या मिरवणुकीवर पावसाने हजेरी लावली होती. अत्यंत उत्साहात झांज पथक, ढोल-ताशा, पारंपरिक वाद्ये आणि डॉल्बीच्या आवाजात मिरवणूक पार पडली.

| September 20, 2013 01:59 am

सातारा शहरात गणपती विसर्जनाच्या मिरवणुकीवर पावसाने हजेरी लावली होती. अत्यंत उत्साहात झांज पथक, ढोल-ताशा, पारंपरिक वाद्ये आणि डॉल्बीच्या आवाजात मिरवणूक पार पडली.
नगरपालिका गणेशोत्सव मंडळाचा गणपती सायंकाळी मिरवणुकीसाठी आला. खासदार उदयनराजे भोसले, आमदार शिवेंद्रराजे भोसले, नगराध्यक्षा सुजाता राजेमहाडीक, उपनगराध्यक्ष अमोल मोहिते आणि अनेक अधिका-यांच्या उपस्थितीत खा. उदयनराजे भोसले यांनी आरती केल्यावर मिरवणुकीला सुरुवात झाली. येथील सम्राट मंडळाच्या गणपतीची सकाळी ११ वाजताच मिरवणुकीला सुरुवात झाली होती. नगरपालिकेच्या वतीने सर्व मंडळांचा स्मृतिचिन्ह, श्रीफळ व प्रमाणपत्र देऊन सत्कार करण्यात येत होता. या मिरवणुकीत १६५ मंडळांनी सहभाग घेतला होता. अनंत चतुर्थीपूर्वी मंगळवारी १२१ मंडळांनी आपल्या गणपतीचे विसर्जन केले होते. सायंकाळी आलेल्या पावसाचा मिरवणुकीवर कोणताही परिणाम झाला नाही. तरुणाईतल्या उत्साहाला उधाण आले होते.

भर पावसातही सातारकरांनी मिरवणुकीचा आनंद लुटला. मंगळवार तळ्यात मंडळाच्या गणपतीचे विसर्जन करण्यात येत होते. विसर्जन मिरवणुकीसाठी १६ सीसीटीव्ही कॅमेरे लक्ष ठेवून होते. मोठा पोलीस बंदोबस्त होता. जिल्हा पोलीस प्रमुख प्रसन्ना स्वत: बंदोबस्ताची पाहणी करत होते, तर जिल्ह्य़ातील परिस्थितीचा आढावा घेत होते.
अत्यंत उत्साहात पहाटे चारच्या दरम्यान मिरवणुकीच्या शेवटच्या गणपतीचे विसर्जन झाले. एकूणच मिरवणूक शांततेत पार पडली.
वाईला उत्साहात गणेश विसर्जन
पारंपरिक वाद्ये, ढोल-ताशा डॉल्बीच्या आवाजात आणि तरुणाईच्या जोशात गणपती विसर्जनाची मिरवणूक पार पडली. पारंपरिक मिरवणुकीची शिस्त तोडून या वेळी दोन वेगवेगळ्या मिरवणुका निघाल्याने मिरवणुकीचे नियोजन आणि बंदोबस्त ठेवताना पोलिसांना तारेवरची कसरत करावी लागली.
सकाळी अकरा वाजता येथील मानाचा ब्राह्मणशाही गणेशोत्सव मंडळाच्या गणपतीची आरती झाल्यावर तो मिरवणुकीसाठी रवाना झाला. दुपारी तीन वाजता आमदार मकरंद पाटील, नगराध्यक्षा नीलिमा खरात, प्रांताधिकारी सूरज वाघमारे, तहसीलदार सुनील चंदनशिवे, उपनगराध्यक्ष भूषण गायकवाड आदींच्या उपस्थितीत आरती करून श्रीफळ वाढवून व फीत कापून मिरवणुकीस सुरुवात झाली. त्यावेळी मानाच्या गणपती मागे बाल गणेश मंडळ, ब्राह्मणशाही, रामडोह आणि गणेशोत्सव मंडळाची भव्य गणेश मूर्ती, यंग रविवार गणेशोत्सव मंडळ, नवजवान गणेशोत्सव मंडळ, दाणे बाजार आदी मंडळाचे गणपती होते.
दुपारी तीनच्या सुमारास रविवार पेठेतील मंडळांनी परटाचा पार येथे ज्येष्ठ कार्यकर्ते नामदेव सूर्यवंशी व पोलीस निरीक्षक दयानंद ढोणे यांच्या उपस्थितीत दुसरी मिरवणूक सुरू झाली. त्यामुळे प्रथमच ११९ वर्षांनंतर शहरातील गणपती विसर्जनाची वेगळी मिरवणूक सुरू झाली. त्यामुळे शहरातील गणेशोत्सव मंडळांचे दर्शन झाले. या मिरवणुकीमुळे शहरातील नागरिकांसह अनेक ज्येष्ठ सामाजिक कार्यकर्ते व मंडळाकडून नाराजी व्यक्त करण्यात आली. यामुळे मिरवणुकीचे नियोजन आणि व्यवस्थापन करताना प्रशासन व पोलिसांना तारेवरची कसरत करावी लागली. त्यातच सायंकाळी पाऊस सुरू झाला. त्यामुळे एकूणच साशंकता असतानाही किरकोळ मारामारीचे प्रकार वगळता मिरवणूक शांततेत पार पडली. उपविभागीय पोलीस अधिकारी भास्कर धस यांच्या नेतृत्वाखाली चोख पोलीस बंदोबस्त होता. मनिष भंडारे मित्र समूह, अरविंद पोरे, रोटरी क्लब आदींनी पोलिसांना फूड पॅकेट्स, फळे, पाण्याच्या बाटल्या आदींचे वाटप केले. मिरवणूक मोठय़ा उत्साहात पार पडली.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 20, 2013 1:59 am

Web Title: goodbye to lord ganesha in satara
टॅग : Lord Ganesha,Satara
Next Stories
1 हजारो गणभक्तांकडून कराडात लाडक्या गणरायाला निरोप
2 वरुणराजाच्या हजेरीने पंढरपूरमध्ये विसर्जन
3 ओंगळवाण्या मिरवणुकीला पावसानेच घातले वेसण
Just Now!
X