‘गणपती बाप्पा मोरया’ चा उद्घोष, लेझीम, झांज, टिपऱ्यांचा बहारदार खेळ, हलगी- ताशांचा कडकडाट, सनईचा सुमधूर स्वर, गुलाल, अरगजा आणि फुलांची मुक्त उधळण अशा जल्लोषमय वातावरणात वाजत-गाजत मिरवणुका काढून विघ्नहर्त्यां लाडक्या श्री गणरायाचे सोलापूरवासीयांनी स्वागत केले. रात्री उशिरापर्यंत श्री गणरायाच्या प्रतिष्ठापनेच्या मिरवणुका सुरुच होत्या. शहरात १३५१ सार्वजनिक मंडळांनी ’श्री’ ची प्रतिष्ठापना केली. लाडक्या गणरायाच्या आगमनाची गेल्या दोन दिवसांपासून तमाम भक्तांना आतुरता लागली होती. उत्कंठा, लगबग आणि उत्साह सर्वत्र दिसून येत होता. विशेषत काल रविवारपासून सर्व प्रमुख बाजारपेठा खरेदीसाठी फुलून गेल्या होत्या. मधला मारुती, टिळक चौक, कौंतम चौक, राजेंद्र चौक, जोडबसवण्णा चौक, अशोक चौक, विजापूर रोड, होटगी रोडवरील आसरा परिसर, रेल्वे स्थानक परिसर आदी भागात खरेदीचा उत्साह मोठया प्रमाणात दिसत होता. टिळक चौक, कन्ना चौक, राजेंद्र चौक, जोडबसवण्णा चौक आदी भागात गणरायाच्या मूर्ती विक्रीची दालने थाटण्यात आली होती. २५ रुपयापासून ते २५ हजारापर्यंत मूर्तीचे दर होते. सायंकाळी उशिरापर्यंत खरेदी केलेल्या मूर्ती घेऊन उत्साही वातावरणात आबालवृध्द मंडळी घराकडे येत होती. शहरात यंदा प्रमुख सहा मध्यवर्ती मंडळांच्या अधिपत्याखाली एकूण १३५१ सार्वजनिक मंडळांनी गणरायाची प्रतिष्ठापना केली. पंचांगकत्रे मोहन दाते यांच्या माहितीनुसार दुपारी दीडपर्यंत ‘श्री’ च्या प्रतिष्ठापनेचा मुहूर्त होता. परंतु त्यासाठी गुरुजी उपलब्ध होत नव्हते. त्यातच मंडळांच्या लांबलेल्या मिरवणुका आणि कार्यकर्त्यांचा उत्साह यामुळे ‘श्री’ च्या प्रतिष्ठापनेचा मुहूर्त लांबत गेला. १२७ वर्षांची ऐतिहासिक परंपरा लाभलेल्या मानाच्या आजोबा गणपतीची प्रतिष्ठापना माणिक चौकातील मंदिरात मंगलमय वातावरणात झाली. याशिवाय पत्रा तालीम येथे लोकमान्य संयुक्त गणेशोत्सव महामंडळाच्या पणजोबा गणपतीची प्रतिष्ठापना करण्यात आली. तसेच पूर्वभाग मध्यवर्ती मंडळाचा ‘ताता गणपती’, होटगी रोड मध्यवर्ती मंडळ, विजापूर रोड परिसर मध्यवर्ती मंडळ, विडी घरकूल मध्यवर्ती मंडळ आदी प्रमुख मध्यवर्ती मंडळांच्या ‘श्री’ ची प्रतिष्ठापना ठरलेल्या मुहूर्तावर झाली. चौपाडात थोरला मंगळवेढा तालीम मंडळाच्या महाकाय गणरायाची प्रतिष्ठापना सायंकाळी उशिरा करण्यात आली. बाळीवेशीतील मानाच्या कसबा गणपतीची प्रतिष्ठापना भव्य मिरवणुकीने करण्यात आली. भव्य व शिस्तबद्ध लेझीम पथक, संगीत बँड पथक, खिलारी बलांच्या जोडया मिरवणुकीत होत्या. बाळीवेस मंडळाची मिरवणूकही भव्य होती. नरसिंग गिरजी मिल चाळीतील अष्टविनायक मंडळ, अवंतीनगर मंडळ, जुळे सोलापुरातील इंडियन मॉडेल स्कूल आदी मंडळांच्या मिरवणुका आकर्षक होत्या. इंडियन मॉडेलच्या मिरवणुकीचा शुभारंभ अलका राठोड यांच्या हस्ते गणेश पूजनाने झाला. या वेळी मंडळाच्या लेझीम पथकात शाळकरी मुलांबरोबर सहभागी होऊन लेझीम खेळण्याचा मोह महापौर अलका राठोड यांना आवरता आला नाही. दुपारनंतर आकाशात ढगांची गर्दी झाल्यामुळे मिरवणुका पुढे सरकण्यासाठी सर्वाची लगबग दिसून आली.
