घरात एकटय़ा असलेल्या महिलेचे हात-पाय बांधून रोख १७ हजार रुपये, तसेच ३० हजार रुपये किंमतीचे सोन्याचे दागिने चोरटय़ांनी लांबविले. मुकुंदवाडी पोलीस ठाण्यात या बाबत नोंद करण्यात आली. बुधवारी पहाटे तीनच्या सुमारास गारखेडा येथे ही चोरी झाली. आशा गणेश पांढरे (वय ४०, राजेशनगर, प्लॉट नं. ५१, गारखेडा, औरंगाबाद) या महिलेने फिर्याद दिली. ही महिला तिच्या राहत्या घरी एकटीच असताना २५ ते ३० वयोगटातील सात चोरटय़ांनी पहाटेच्या वेळी तिच्या घराचा मागील दरवाजा तोडून आत प्रवेश केला व या महिलेला मारहाण केली. तसेच हात-पाय बांधून सोन्याचे मणिमंगळसूत्र, टापसे असे २० ग्रॅमचे सोन्याचे दागिने व रोख १७ हजार रुपये लुटून नेले.