ज्ञान अमृत बहुउद्देशीय आदिवासी संस्थेला येथील प्रगती महिला शैक्षणिक विकास संस्थेच्या वतीने देण्यात येणाऱ्या राज्यस्तरीय समाजभूषण पुरस्काराने म्हाडाचे सभापती नरेंद्र दराडे यांच्या हस्ते गौरविण्यात आले.पंचवटीतील पंडित पलुस्कर सभागृहात आयोजित सोहळ्यात संस्थेचे अध्यक्ष कैलास सूर्यवंशी यांनी हा पुरस्कार स्वीकारला. ज्ञान अमृत बहुउद्देशीय आदिवासी संस्थेमार्फत विविध सेवाभावी, सामाजिक उपक्रम राबविण्यात आले आहेत. यामध्ये प्रामुख्याने स्त्रीभ्रूण हत्येविरोधात जनजागृती, रक्तदान शिबीर, वृक्षारोपण, मनोरुग्ण व कर्णबधीर विद्यार्थ्यांसाठी मिठाई वाटप इत्यादी उपक्रम राबविण्यात येत आहेत. पुरस्कार वितरण समारंभाप्रसंगी प्रा. डी. के. गोसावी, डॉ. यशवंत पाटील, प्रा. राम कुलकर्णी, जया वाघ आदी उपस्थित होते.
